ਨੀਤੀ ਆਯੋਗ ਦੀ ਬੈਠਕ ਵਿੱਚ ਮੁੱਖ ਮੰਤਰੀ ਦੇ ਇਲਜ਼ਾਮਾਂ ‘ਤੇ ਪੰਜਾਬ ਭਾਜਪਾ ਦਾ ਤਿੱਖਾ ਜਵਾਬ*
*ਚੰਡੀਗੜ੍ਹ, 24 ਮਈ*
ਭਾਖੜਾ ਬਿਆਸ ਪ੍ਰਬੰਧਨ ਬੋਰਡ (ਬੀ.ਬੀ.ਐੱਮ.ਬੀ.) ਵਿੱਚ ਪੰਜਾਬ ਦੇ 2550 ਪਦ ਲੰਬੇ ਸਮੇਂ ਤੋਂ ਖਾਲੀ ਪਏ ਹਨ, ਜਿਨ੍ਹਾਂ ਵਿੱਚ ਕਈ ਮਹੱਤਵਪੂਰਨ ਅਤੇ ਅਸਰਦਾਰ ਪਦ ਸ਼ਾਮਲ ਹਨ। ਭਾਜਪਾ ਦਾ ਇਲਜ਼ਾਮ ਹੈ ਕਿ ਜੇ ਪੰਜਾਬ ਸਰਕਾਰ ਸਮੇਂ ਸਿਰ ਇਹ ਪਦ ਭਰਦੀ, ਤਾਂ ਬੋਰਡ ਵਿੱਚ ਰਾਜ ਦਾ ਪੱਖ ਵਧੇਰੇ ਮਜ਼ਬੂਤੀ ਨਾਲ ਰੱਖਿਆ ਜਾ ਸਕਦਾ ਸੀ। ਹਰਿਆਣਾ ਸਰਕਾਰ ਨੇ ਆਪਣੇ ਸਾਰੇ ਪਦ ਭਰੇ ਹੋਏ ਹਨ ਅਤੇ ਸਰਗਰਮੀ ਨਾਲ ਆਪਣੇ ਹਿੱਤਾਂ ਦੀ ਰੱਖਿਆ ਕਰ ਰਹੀ ਹੈ, ਜਦੋਂ ਕਿ ਪੰਜਾਬ ਸਰਕਾਰ ਦੀ ਲਾਪਰਵਾਹੀ ਕਾਰਨ ਰਾਜ ਦੀ ਭਾਗੀਦਾਰੀ ਕਮਜ਼ੋਰ ਹੋ ਗਈ ਹੈ।
ਨੀਤੀ ਆਯੋਗ ਦੀ ਬੈਠਕ ਵਿੱਚ ਮੁੱਖ ਮੰਤਰੀ ਭਗਵੰਤ ਮਾਨ ਦੁਆਰਾ ਲਗਾਏ ਗਏ ਇਲਜ਼ਾਮਾਂ ‘ਤੇ ਪਲਟਵਾਰ ਕਰਦਿਆਂ ਪੰਜਾਬ ਭਾਜਪਾ ਦੇ ਮੀਡੀਆ ਪ੍ਰਭਾਰੀ ਵਿਨੀਤ ਜੋਸ਼ੀ ਨੇ ਕਿਹਾ ਕਿ ਹੁਣ ਮੁੱਖ ਮੰਤਰੀ ਬੀ.ਬੀ.ਐੱਮ.ਬੀ. ਦੇ ਮਸਲੇ ਨੂੰ ਸਿਰਫ਼ ਆਪਣੀਆਂ ਨਾਕਾਮੀਆਂ ਲੁਕਾਉਣ ਲਈ ਉਠਾ ਰਹੇ ਹਨ। ਤਿੰਨ ਸਾਲ ਤੱਕ ਮੁੱਖ ਮੰਤਰੀ ਨੂੰ ਹਰਿਆਣਾ ਨੂੰ ਦਿੱਤੇ ਜਾ ਰਹੇ ਵਾਧੂ ਪਾਣੀ ਦੀ ਯਾਦ ਨਹੀਂ ਆਈ, ਪਰ ਹੁਣ ਚੋਣਾਂ ਦੇ ਮੌਸਮ ਵਿੱਚ ਉਹ ਕਿਸਾਨਾਂ ਦੇ ਗੁੱਸੇ ਤੋਂ ਬਚਣ ਲਈ ਇਸ ਮੁੱਦੇ ਨੂੰ ਗਰਮਾ ਰਹੇ ਹਨ।
ਭਾਜਪਾ ਨੇਤਾ ਨੇ ਕਿਹਾ ਕਿ ਇਸ ਵਾਰ ਰਾਜ ਦੀਆਂ ਮੰਡੀਆਂ ਵਿੱਚ ਕਿਸਾਨ ਬੁਰੀ ਤਰ੍ਹਾਂ ਪਰੇਸ਼ਾਨ ਹਨ। ਫ਼ਸਲਾਂ ਦੀ ਖਰੀਦ ਵਿੱਚ ਦੇਰੀ ਅਤੇ ਅਵਿਵਸਥਾ ਦੇ ਕਾਰਨ ਆਮ ਆਦਮੀ ਪਾਰਟੀ ਸਰਕਾਰ ਕਿਸਾਨਾਂ ਦੇ ਗੁੱਸੇ ਨੂੰ ਸਮਝ ਰਹੀ ਹੈ ਅਤੇ ਧਿਆਨ ਭਟਕਾਉਣ ਲਈ ਬੀ.ਬੀ.ਐੱਮ.ਬੀ. ਜੈਸੇ ਮੁੱਦਿਆਂ ਨੂੰ ਹਵਾ ਦੇ ਰਹੀ ਹੈ।
ਸੀ.ਆਈ.ਐੱਸ.ਐੱਫ਼. ਦੀ ਬੀ.ਬੀ.ਐੱਮ.ਬੀ. ਵਿੱਚ ਤਾਇਨਾਤੀ ਨੂੰ ਲੈ ਕੇ ਜਤਾਈ ਜਾ ਰਹੀ ਨਾਰਾਜ਼ਗੀ ‘ਤੇ ਵੀ ਭਾਜਪਾ ਨੇ ਸਵਾਲ ਉਠਾਏ। ਜੋਸ਼ੀ ਨੇ ਕਿਹਾ ਕਿ ਜੇ ਕਿਸੇ ਰਾਜ ਨੂੰ ਇਤਰਾਜ਼ ਹੋਣਾ ਚਾਹੀਦਾ ਹੈ, ਤਾਂ ਉਹ ਹਿਮਾਚਲ ਪ੍ਰਦੇਸ਼ ਹੈ, ਜਿਸਦੇ 200 ਤੋਂ ਵੱਧ ਪੁਲਿਸਕਰਮੀ ਬੀ.ਬੀ.ਐੱਮ.ਬੀ. ਵਿੱਚ ਤੈਨਾਤ ਹਨ। ਇਸ ਦੇ ਉਲਟ, ਪੰਜਾਬ ਦੇ ਸਿਰਫ਼ 15 ਪੁਲਿਸਕਰਮੀ ਉੱਥੇ ਮੌਜੂਦ ਹਨ। ਇਸ ਲਈ ਇਸ ‘ਤੇ ਮਗਰਮੱਛ ਦੇ ਹੰਝੂ ਨਾ ਵਹਾਉਣ।
ਵਿਨੀਤ ਜੋਸ਼ੀ ਨੇ ਮੁੱਖ ਮੰਤਰੀ ਮਾਨ ਦੀ ਕਾਰਜਸ਼ੈਲੀ ‘ਤੇ ਵਿਅੰਗ ਕਰਦਿਆਂ ਕਿਹਾ, “ਤੁਸੀਂ ਮੁੱਖ ਮੰਤਰੀ ਬਣ ਤਾਂ ਗਏ ਹੋ, ਪਰ ਤੁਹਾਡੇ ਅੰਦਰਲਾ ਕਲਾਕਾਰ ਅਜੇ ਮਰਿਆ ਨਹੀਂ ਹੈ। ਤੁਸੀਂ ਅਜੇ ਵੀ ਅਭਿਨੈ ਕਰ ਰਹੇ ਹੋ, ਪਰ ਇਸ ਨਾਲ ਪੰਜਾਬ ਦਾ ਭਲਾ ਨਹੀਂ ਹੋਣਾ।
