ਸੜਕ ਸੁਰੱਖਿਆ ਨੂੰ ਵਧਾਉਣ ਅਤੇ ਸੁਰੱਖਿਅਤ ਸ਼ਹਿਰੀ ਗਤੀਸ਼ੀਲਤਾ ਸੁਨਿਸ਼ਚਿਤ ਕਰਨ ਦੇ ਲਈ ਇੱਕ ਮਹੱਤਵਪੂਰਨ ਕਦਮ ਉਠਾਉਂਦੇ ਹੋਏ, ਚੰਡੀਗੜ੍ਹ ਪ੍ਰਸ਼ਾਸਨ

ਚੰਡੀਗੜ੍ਹ, 20 ਮਈ, 2025 —

ਚੰਡੀਗੜ੍ਹ ਪ੍ਰਸ਼ਾਸਨ ਨੇ ਅੱਜ ਚੰਡੀਗੜ੍ਹ ਦੇ ਡਿਪਟੀ ਕਮਿਸ਼ਨਰ ਦੀ ਪ੍ਰਧਾਨਗੀ ਹੇਠ ਇੱਕ ਵਿਆਪਕ ਜ਼ਿਲ੍ਹਾ ਸੜਕ ਸੁਰੱਖਿਆ ਕਮੇਟੀ ਦੀ ਬੈਠਕ ਆਯੋਜਿਤ ਕੀਤੀ।

ਬੈਠਕ ਵਿੱਚ ਸੀਨੀਅਰ ਸੁਪਰਡੈਂਟ ਆਵ੍ ਪੁਲਿਸ (ਟ੍ਰੈਫਿਕ ਅਤੇ ਸੁਰੱਖਿਆ), ਚੰਡੀਗੜ੍ਹ ਪ੍ਰਸ਼ਾਸਨ ਦੇ ਮੁੱਖ ਇੰਜੀਨੀਅਰ, ਨਗਰ ਨਿਗਮ ਚੰਡੀਗੜ੍ਹ ਦੇ ਸੀਨੀਅਰ ਅਧਿਕਾਰੀਆਂ ਅਤੇ ਚੰਡੀਗੜ੍ਹ ਦੇ ਚੀਫ਼ ਆਰਕੀਟੈਕਟ ਤੋਂ ਇਲਾਵਾ ਹੋਰ ਪ੍ਰਮੁੱਖ ਵਿਭਾਗਾਂ ਦੇ ਪ੍ਰਤੀਨਿਧੀਆਂ ਨੇ ਸਰਗਰਮ ਭਾਗੀਦਾਰੀ ਕੀਤੀ।
ਸੈਸ਼ਨ ਵਿੱਚ ਸ਼ਹਿਰ ਭਰ ‘ਚ ਐਨਹਾਂਸਡ ਟ੍ਰੈਫਿਕ ਰੈਗੂਲੇਸ਼ਨ, ਪੈਦਲ ਯਾਤਰੀਆਂ ਦੀ ਸੁਰੱਖਿਆ ਅਤੇ ਬੁਨਿਆਦੀ ਢਾਂਚੇ ਵਿੱਚ ਸੁਧਾਰਾਂ ਦੀ ਤਤਕਾਲ ਜ਼ਰੂਰਤ ‘ਤੇ ਧਿਆਨ ਕੇਂਦ੍ਰਿਤ ਕੀਤਾ ਗਿਆ।

ਚਰਚਾ ਅਤੇ ਨਿਰਦੇਸ਼ਿਤ ਕੀਤੀਆਂ ਗਈਆਂ ਪ੍ਰਮੁੱਖ ਪਹਿਲਾਂ:

1. ਪੈਦਲ ਯਾਤਰੀ-ਕੇਂਦ੍ਰਿਤ ਟ੍ਰੈਫਿਕ ਸਿਗਨਲ ਟਾਇਮਰ-

ਪੈਦਲ ਯਾਤਰੀਆਂ ਦੀ ਸੁਰੱਖਿਆ ਦੀ ਜ਼ਰੂਰਤ ਨੂੰ ਸਮਝਦੇ ਹੋਏ, ਡਿਪਟੀ ਕਮਿਸ਼ਨਰ ਨੇ ਪ੍ਰਮੁੱਖ ਕਰਾਸਿੰਗਾਂ ‘ਤੇ ਕਾਊਂਟਡਾਊਨ ਟਾਇਮਰਾਂ ਵਾਲੀਆਂ ਟ੍ਰੈਫਿਕ ਲਾਇਟਾਂ ਲਗਾਉਣ ਦੀ ਸਿਫਾਰਸ਼ ਕੀਤੀ। ਇਹ ਟਾਇਮਰ ਪੈਦਲ ਯਾਤਰੀਆਂ ਨੂੰ ਸੁਰੱਖਿਅਤ ਕਰਾਸਿੰਗ ਸਮੇਂ ਦਾ ਮੁੱਲਾਂਕਣ ਕਰਨ ਵਿੱਚ ਸਹਾਇਤਾ ਕਰਨਗੇ, ਖਾਸ ਕਰਕੇ ਬੱਚਿਆਂ, ਬਜ਼ੁਰਗਾਂ ਅਤੇ ਦਿੱਵਯਾਂਗਜਨਾਂ ਦੀ ਸਹਾਇਤਾ ਕਰਨਗੇ।

2. ਪੂਰਵ ਮਾਰਗ ‘ਤੇ ਸਾਇਕਲ ਟ੍ਰੈਕ-

ਬੈਠਕ ਦੇ ਦੌਰਾਨ ਚੇਅਰਮੈਨ ਨੂੰ ਦੱਸਿਆ ਗਿਆ ਕਿ ਪੂਰਵ ਮਾਰਗ ‘ਤੇ ਸਾਇਕਲ ਟ੍ਰੈਕ ਵਿਛਾਉਣ ਦੇ ਲਈ ਜ਼ਰੂਰੀ ਪ੍ਰਸ਼ਾਸਕੀ ਅਤੇ ਵਿੱਤੀ ਪ੍ਰਵਾਨਗੀ ਮਿਲ ਗਈ ਹੈ ਅਤੇ ਜਲਦੀ ਹੀ ਇਸ ‘ਤੇ ਕੰਮ ਸ਼ੁਰੂ ਹੋ ਜਾਵੇਗਾ।

3. ਸੰਵੇਦਨਸ਼ੀਲ ਜ਼ੋਨਾਂ ਦੇ ਨੇੜੇ ‘ਨੋ ਹੌਂਕਿੰਗ’ ਸਾਇਨੇਜ਼ (‘No Honking’ Signage) ਦੀ ਸਥਾਪਨਾ-

ਡਿਪਟੀ ਕਮਿਸ਼ਨਰ ਨੇ ਹਸਪਤਾਲਾਂ ਅਤੇ ਵਿੱਦਿਅਕ ਸੰਸਥਾਵਾਂ ਦੇ ਆਸਪਾਸ ‘ਨੋ ਹੌਂਕਿੰਗ’ (‘No Honking’) ਜ਼ੋਨ ਸਥਾਪਿਤ ਕਰਨ ਦੀ ਤੁਰੰਤ ਜ਼ਰੂਰਤ ‘ਤੇ ਜ਼ੋਰ ਦਿੱਤਾ। ਬਹੁਤ ਜ਼ਿਆਦਾ ਹਾਰਨ ਵਜਾਉਣ ਨਾਲ ਧੁਨੀ ਪ੍ਰਦੂਸ਼ਣ ਹੁੰਦਾ ਹੈ, ਜੋ ਖਾਸ ਤੌਰ ‘ਤੇ ਉਨ੍ਹਾਂ ਖੇਤਰਾਂ ਵਿੱਚ ਹਾਨੀਕਾਰਕ ਹੈ, ਜਿੱਥੇ ਸ਼ਾਂਤੀ ਅਤੇ ਇਕਾਗਰਤਾ ਦੀ ਜ਼ਰੂਰਤ ਹੁੰਦੀ ਹੈ। ਇਹ ਪਹਿਲ ਚੰਡੀਗੜ੍ਹ ਭਰ ਵਿੱਚ ਜ਼ਿੰਮੇਦਾਰ ਡ੍ਰਾਇਵਿੰਗ ਵਿਵਹਾਰ ਨੂੰ ਹੁਲਾਰਾ ਦੇਣ ਅਤੇ ਸ਼ੋਰ-ਸੰਵੇਦਨਸ਼ੀਲ ਜ਼ੋਨ ਬਣਾਉਣ ਦੀ ਇੱਕ ਵਿਆਪਕ ਰਣਨੀਤੀ ਦਾ ਹਿੱਸਾ ਹੈ।

4. ਸ਼ਹਿਰ ਵਿੱਚ ਪ੍ਰਵੇਸ਼ ਕਰਨ ਵਾਲੀਆਂ ਸੜਕਾਂ ‘ਤੇ ਰੰਬਲ ਸਟ੍ਰਿਪਸ (Rumble Strips)-

ਸ਼ਹਿਰ ਦੇ ਮੁੱਖ ਐਂਟਰੀ ਪੁਆਇੰਟਸ ‘ਤੇ ਤੇਜ਼ ਗਤੀ ਨੂੰ ਘਟਾਉਣ ਅਤੇ ਵਾਹਨ ਨਿਯੰਤ੍ਰਣ ਵਿੱਚ ਸੁਧਾਰ ਕਰਨ ਦੇ ਲਈ, ਕਮੇਟੀ ਨੇ ਰੰਬਲ ਸਟ੍ਰਿਪਸ (rumble strips) ਲਗਾਉਣ ਦੀ ਤਾਕੀਦ ਕੀਤੀ। ਇਹ ਟ੍ਰੈਫਿਕ-ਸ਼ਾਂਤ ਕਰਨ ਵਾਲੇ ਉਪਕਰਣ ਡ੍ਰਾਇਵਰਾਂ ਨੂੰ ਸਚੇਤ ਕਰਨਗੇ ਅਤੇ ਸ਼ਹਿਰੀ ਖੇਤਰਾਂ ਵਿੱਚ ਪ੍ਰਵੇਸ਼ ਕਰਦੇ ਸਮੇਂ ਗਤੀ ਨੂੰ ਨਿਯੰਤ੍ਰਿਤ ਕਰਨ ਵਿੱਚ ਮਦਦ ਕਰਨਗੇ, ਜਿਸ ਨਾਲ ਹਾਦਸਿਆਂ ਦਾ ਜੋਖਮ ਘੱਟ ਹੋਵੇਗਾ।

5. ਬਲਿੰਕਰਸ (Blinkers) ਦੀ ਕਾਰਜਸਮਰੱਥਾ ਅਤੇ ਰੱਖ-ਰਖਾਅ-

ਡਿਪਟੀ ਕਮਿਸ਼ਨਰ ਨੇ ਸਬੰਧਿਤ ਵਿਭਾਗਾਂ ਨੂੰ ਸਾਰੀਆਂ ਪ੍ਰਮੁੱਖ ਸੜਕਾਂ ‘ਤੇ ਗ਼ੈਰ-ਕਾਰਜਸ਼ੀਲ ਬਲਿੰਕਰਸ (Blinkers) ਦੀ ਪਹਿਚਾਣ ਕਰਨ ਅਤੇ ਉਨ੍ਹਾਂ ਦੀਆਂ ਬੈਟਰੀਆਂ ਨੂੰ ਤੁਰੰਤ ਬਦਲਣ ਦੇ ਨਿਰਦੇਸ਼ ਦਿੱਤੇ। ਬਲਿੰਕਰਸ ਰਾਤ ਦੇ ਸਮੇਂ ਅਤੇ ਘੱਟ ਦ੍ਰਿਸ਼ਟਤਾ ਵਾਲੇ ਟ੍ਰੈਫਿਕ ਪ੍ਰਬੰਧਨ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ। ਟਕਰਾਅ ਨੂੰ ਰੋਕਣ ਅਤੇ ਸੜਕ ਉਪਭੋਗਤਾਵਾਂ ਦਾ ਪ੍ਰਭਾਵੀ ਢੰਗ ਨਾਲ ਮਾਰਗਦਰਸ਼ਨ ਕਰਨ ਦੇ ਲਈ ਇਹ ਸੁਨਿਸ਼ਚਿਤ ਕਰਨਾ ਮਹੱਤਵਪੂਰਨ ਹੈ ਕਿ ਉਹ ਚਾਲੂ ਰਹਿਣ।

6. ਟ੍ਰੈਫਿਕ ਬੂਥਾਂ ਦੀ ਜਲਦੀ ਸਥਾਪਨਾ-

ਡਿਪਟੀ ਕਮਿਸ਼ਨਰ ਨੇ ਨਾਜ਼ੁਕ ਚੌਰਾਹਿਆਂ ‘ਤੇ ਟ੍ਰੈਫਿਕ ਬੂਥਾਂ ਦੀ ਲੰਬਿਤ ਸਥਾਪਨਾ ਨੂੰ ਪੂਰਾ ਕਰਨ ਦੀ ਜ਼ਰੂਰਤ ‘ਤੇ ਵੀ ਜ਼ੋਰ ਦਿੱਤਾ। ਇਹ ਬੂਥ ਟ੍ਰੈਫਿਕ ਕਰਮੀਆਂ ਦੇ ਲਈ ਕੰਟਰੋਲ ਪੁਆਇੰਟਸ ਦੇ ਰੂਪ ਵਿੱਚ ਕਾਰਜ ਕਰਦੇ ਹਨ, ਭੀੜ-ਭਾੜ ਦਾ ਪ੍ਰਬੰਧਨ ਕਰਨ ਵਿੱਚ ਮਦਦ ਕਰਦੇ ਹਨ, ਅਤੇ ਮਾਰਗਦਰਸ਼ਨ ਜਾਂ ਐਮਰਜੈਂਸੀ ਸਹਾਇਤਾ ਦੀ ਜ਼ਰੂਰਤ ਵਾਲੇ ਯਾਤਰੀਆਂ ਨੂੰ ਸਹਾਇਤਾ ਪ੍ਰਦਾਨ ਕਰਦੇ ਹਨ।

ਅੰਤਰ-ਵਿਭਾਗੀ ਸਹਿਯੋਗ ਦੇ ਲਈ ਪ੍ਰਤੀਬੱਧਤਾ

ਡਿਪਟੀ ਕਮਿਸ਼ਨਰ ਨੇ ਇਨ੍ਹਾਂ ਉਪਾਵਾਂ ਦੇ ਸਮੇਂ ਸਿਰ ਲਾਗੂਕਰਨ ਨੂੰ ਸੁਨਿਸ਼ਚਿਤ ਕਰਨ ਦੇ ਲਈ ਨਿਰਵਿਘਨ ਅੰਤਰ-ਵਿਭਾਗੀ ਤਾਲਮੇਲ ਦੀ ਜ਼ਰੂਰਤ ਨੂੰ ਦੁਹਰਾਇਆ। ਪੁਲਿਸ, ਇੰਜੀਨੀਅਰਿੰਗ ਵਿਭਾਗ, ਚੰਡੀਗੜ੍ਹ ਪ੍ਰਸ਼ਾਸਨ ਅਤੇ ਨਗਰ ਨਿਗਮ, ਇੰਜੀਨੀਅਰਿੰਗ ਵਿੰਗ, ਆਰਕੀਟੈਕਚਰ ਵਿਭਾਗ ਦੇ ਦਰਮਿਆਨ ਸਹਿਯੋਗ ਪ੍ਰਸ਼ਾਸਨ ਦੇ ਸੜਕ ਸੁਰੱਖਿਆ ਲਕਸ਼ਾਂ ਨੂੰ ਪ੍ਰਾਪਤ ਕਰਨ ਦੇ ਲਈ ਮਹੱਤਵਪੂਰਨ ਹੈ।

ਡਿਪਟੀ ਕਮਿਸ਼ਨਰ ਨੇ ਕਿਹਾ, “ਸੁਰੱਖਿਅਤ ਅਤੇ ਸੁਲਭ ਸੜਕਾਂ ਸੁਨਿਸ਼ਚਿਤ ਕਰਨਾ ਇੱਕ ਸਾਂਝੀ ਜ਼ਿੰਮੇਦਾਰੀ ਹੈ। ਇਨ੍ਹਾਂ ਕਾਰਵਾਈਯੋਗ ਕਦਮਾਂ ਨਾਲ, ਸਾਡਾ ਉਦੇਸ਼ ਚੰਡੀਗੜ੍ਹ ਨੂੰ ਨਾ ਕੇਵਲ ਸਮਾਰਟ ਬਣਾਉਣਾ ਹੈ, ਬਲਕਿ ਹਰੇਕ ਨਾਗਰਿਕ ਲਈ ਮਹੱਤਵਪੂਰਨ ਤੌਰ ‘ਤੇ ਸੁਰੱਖਿਅਤ ਬਣਾਉਣਾ ਹੈ – ਭਾਵੇਂ ਉਹ ਪੈਦਲ ਹੋਵੇ, ਦੋ ਪਹੀਆਂ ‘ਤੇ ਹੋਵੇ, ਜਾਂ ਗੱਡੀ ਵਿੱਚ ਹੋਵੇ (behind the wheel)।”