ਚੰਡੀਗੜ੍ਹ ਇੰਡਸਟ੍ਰੀਅਲ ਐਂਡ ਟੂਰਿਜ਼ਮ ਡਿਵੈਲਪਮੈਂਟ ਕਾਰਪੋਰੇਸ਼ਨ (ਸਿਟਕੋ/CITCO) ਨੇ 26 ਜੁਲਾਈ, 2025 ਨੂੰ ਨਵੀਂ ਦਿੱਲੀ ਦੇ ਹੋਟਲ ਲੇ ਮੈਰੀਡੀਅਨ ਵਿਖੇ ਆਯੋਜਿਤ ਬੀ2ਬੀ ਇੰਟਰਨੈਸ਼ਨਲ ਟੂਰਿਜ਼ਮ ਐਕਸਪੋ, ਕਨਕਲੇਵ ਐਂਡ ਟ੍ਰੈਵਲ ਅਵਾਰਡਸ (ਆਈਟੀਸੀਟੀਏ 2025) ਦੇ 10ਵੇਂ ਐਡੀਸ਼ਨ ਵਿੱਚ “ਬੈਸਟ ਹੋਟਲ ਇਨ ਬਜਟ” ਪੁਰਸਕਾਰ ਜਿੱਤ ਕੇ ਸ਼ਹਿਰ ਦਾ ਨਾਮ ਰੋਸ਼ਨ ਕੀਤਾ ਹੈ। ਇਹ ਮਾਨਤਾ ਉੱਚ ਪੱਧਰੀ ਮਹਿਮਾਨ ਸੰਤੁਸ਼ਟੀ ਨੂੰ ਯਕੀਨੀ ਬਣਾਉਂਦੇ ਹੋਏ, ਕਿਫ਼ਾਇਤੀ ਦਰਾਂ ‘ਤੇ ਗੁਣਵੱਤਾ ਵਾਲੀਆਂ ਪ੍ਰਾਹੁਣਾਚਾਰੀ ਸੇਵਾਵਾਂ ਪ੍ਰਦਾਨ ਕਰਨ ਵਿੱਚ ਸਿਟਕੋ ਦੀ ਨਿਰੰਤਰ ਉਤਕ੍ਰਿਸ਼ਟਤਾ ਨੂੰ ਉਜਾਗਰ ਕਰਦੀ ਹੈ।
ਪੁਰਸਕਾਰ ਸਮਾਰੋਹ ਵਿੱਚ ਦੇਸ਼ ਅਤੇ ਵਿਦੇਸ਼ਾਂ ਤੋਂ ਪ੍ਰਸਿੱਧ ਯਾਤਰਾ ਪੇਸ਼ੇਵਰਾਂ, ਸਰਕਾਰੀ ਅਧਿਕਾਰੀਆਂ ਅਤੇ ਟੂਰਿਜ਼ਮ ਭਾਈਵਾਲਾਂ ਦੀ ਭਾਗੀਦਾਰੀ ਦੇਖਣ ਨੂੰ ਮਿਲੀ। ਸ਼੍ਰੀ ਹਰਮਿਲਨ ਸਿੰਘ, ਡਿਪਟੀ ਜਨਰਲ ਮੈਨੇਜਰ (ਹੋਟਲ), ਨੇ ਸਿਟਕੋ ਦੀ ਨੁਮਾਇੰਦਗੀ ਕੀਤੀ ਅਤੇ ਕਾਰਪੋਰੇਸ਼ਨ ਵੱਲੋਂ ਪੁਰਸਕਾਰ ਪ੍ਰਾਪਤ ਕੀਤਾ।
ਪਿਛਲੇ ਸਾਲ ਦੌਰਾਨ, ਸਿਟਕੋ ਨੇ ਮਹਿਮਾਨਾਂ ਦੇ ਅਨੁਭਵ ਨੂੰ ਵਧਾਉਣ ਲਈ ਮਹੱਤਵਪੂਰਨ ਪਹਿਲਾਂ ਕੀਤੀਆਂ ਹਨ। ਇਨ੍ਹਾਂ ਵਿੱਚ ਇਸ ਦੇ ਹੋਟਲ ਬੁਨਿਆਦੀ ਢਾਂਚੇ ਦਾ ਵਿਆਪਕ ਨਵੀਨੀਕਰਨ ਅਤੇ ਅਪਗ੍ਰੇਡੇਸ਼ਨ, ਡਿਜੀਟਲ ਪਹੁੰਚ ਵਧਾਉਣ ਲਈ ਮੇਕਮਾਈਟ੍ਰਿਪ ਜਿਹੇ ਪ੍ਰਮੁੱਖ ਔਨਲਾਇਨ ਯਾਤਰਾ ਪਲੈਟਫਾਰਮਾਂ ਨਾਲ ਨਾਮਾਂਕਣ, ਅਤੇ ਸੈਲਾਨੀਆਂ ਅਤੇ ਸਥਾਨਕ ਗ੍ਰਾਹਕਾਂ ਦੋਵਾਂ ਲਈ ਇਸ
ਦੇ ਰੈਸਟੋਰੈਂਟਾਂ ਵਿੱਚ ਆਕਰਸ਼ਕ ਪੇਸ਼ਕਸ਼ਾਂ ਅਤੇ ਪ੍ਰਮੋਸ਼ਨਲ ਮੀਨੂ ਦੀ ਸ਼ੁਰੂਆਤ ਸ਼ਾਮਲ ਹੈ।
ਇਸ ਮਾਣਮੱਤੇ ਪਲ ‘ਤੇ ਬੋਲਦੇ ਹੋਏ, ਸਿਟਕੋ ਦੇ ਮੈਨੇਜਿੰਗ ਡਾਇਰੈਕਟਰ, ਆਈਏਐੱਸ, ਸ਼੍ਰੀ ਹਰੀ ਕਲਿੱਕਟ ਨੇ ਕਿਹਾ, “ਇਹ ਪੁਰਸਕਾਰ ਚੰਡੀਗੜ੍ਹ ਲਈ ਇੱਕ ਮਾਣ ਵਾਲਾ ਪਲ ਹੈ ਅਤੇ ਸਾਡੀ ਟੀਮ ਦੇ ਅਣਥੱਕ ਯਤਨਾਂ ਦਾ ਪ੍ਰਮਾਣ ਹੈ। ਅਸੀਂ ਆਪਣੀਆਂ ਸੇਵਾਵਾਂ ਨੂੰ ਅਪਗ੍ਰੇਡ ਕਰਨ, ਆਪਣੀਆਂ ਸੁਵਿਧਾਵਾਂ ਨੂੰ ਆਧੁਨਿਕ ਬਣਾਉਣ ਅਤੇ ਵਿਕਸਿਤ ਹੋ ਰਹੀਆਂ ਮਹਿਮਾਨਾਂ ਦੀਆਂ ਉਮੀਦਾਂ ਦੇ ਅਨੁਕੂਲ ਹੋਣ ਲਈ ਲਗਾਤਾਰ ਕੰਮ ਕੀਤਾ ਹੈ। ਮੇਕਮਾਈਟ੍ਰਿਪ ਜਿਹੇ ਪ੍ਰਮੁੱਖ ਪਲੈਟਫਾਰਮਾਂ ਨਾਲ ਸਾਡੇ ਹਾਲੀਆ ਸਹਿਯੋਗ, ਚਲ ਰਹੇ ਨਵੀਨੀਕਰਨ, ਅਤੇ ਸਾਡੇ ਰੈਸਟੋਰੈਂਟਾਂ ਵਿੱਚ ਇਨੋਵੇਟਿਵ ਪੇਸ਼ਕਸ਼ਾਂ ਉਤਕ੍ਰਿਸ਼ਟਤਾ ਦੇ ਪ੍ਰਤੀ ਸਾਡੀ ਪ੍ਰਤੀਬੱਧਤਾ ਨੂੰ ਦਰਸਾਉਂਦੀਆਂ ਹਨ। ਸਿਟਕੋ ਚੰਡੀਗੜ੍ਹ ਨੂੰ ਭਾਰਤ ਵਿੱਚ ਇੱਕ ਚੋਟੀ ਦਾ ਪ੍ਰਾਹੁਣਾਚਾਰੀ ਅਤੇ ਟੂਰਿਜ਼ਮ ਕੇਂਦਰ ਬਣਾਉਣ ਲਈ ਯਤਨਸ਼ੀਲ ਰਹੇਗੀ।”
ਇਹ ਰਾਸ਼ਟਰੀ ਮਾਨਤਾ ਭਾਰਤ ਦੇ ਟੂਰਿਜ਼ਮ ਅਤੇ ਪ੍ਰਾਹੁਣਾਚਾਰੀ ਉਦਯੋਗ ਵਿੱਚ ਇੱਕ ਭਰੋਸੇਮੰਦ ਅਤੇ ਗਤੀਸ਼ੀਲ ਖਿਡਾਰੀ ਵਜੋਂ ਸਿਟਕੋ ਦੀ ਸਥਿਤੀ ਨੂੰ ਹੋਰ ਮਜ਼ਬੂਤ ਕਰਦੀ ਹੈ, ਜੋ ਇਨੋਵੇਸ਼ਨ, ਕਿਫ਼ਾਇਤ ਅਤੇ ਮਹਿਮਾਨ ਸੰਤੁਸ਼ਟੀ ਦੇ ਲਈ ਸਮਰਪਿਤ ਹੈ।
