ਟਰਾਲੀ ਚੋਰ ਪੁਲਿਸ ਮੁਲਾਜ਼ਮ ਤੇ ਕਾਰਵਾਈ ਕਰਨ ਦੀ ਬਜਾਏ ਬਚਾਉਣ ਚ ਲੱਗੀ ਪੁਲਿਸ
ਟਰਾਲੀ ਚੋਰ ਪੁਲਿਸ ਮੁਲਾਜ਼ਮ ਤੇ ਡੀਆਈਜੀ ਪਟਿਆਲਾ ਖਿਲਾਫ ਹੋਵੇ ਕਾਰਵਾਈ ਨਹੀਂ ਹੋਵੇਗਾ ਸੰਘਰਸ਼
19 ਮਾਰਚ ਨੂੰ ਚੰਡੀਗੜ੍ਹ ਵਿਖੇ ਹੋਈ ਕੇਂਦਰੀ ਮੰਤਰੀਆਂ ਨਾਲ ਮੀਟਿੰਗ ਤੋਂ ਬਾਅਦ ਵਾਪਸੀ ਤੇ ਉਨ੍ਹਾਂ ਸਮੇਤ ਕਿਸਾਨ ਆਗੂਆਂ ਨੂੰ ਗ੍ਰਿਫਤਾਰ ਕਰਕੇ ਪੰਜਾਬ ਸਰਕਾਰ ਨੇ ਜਿੱਥੇ ਕਿਸਾਨਾਂ ਦੀ ਪਿੱਠ ਵਿੱਚ ਛੁਰਾ ਮਾਰਿਆ ਹੈ ਉੱਥੇ ਹੀ ਖਨੌਰੀ, ਸ਼ੰਭੂ ਮੋਰਚੇ ਤੇ ਕਾਰਵਾਈ ਦੌਰਾਨ ਕਰੋੜਾਂ ਰੁਪਏ ਦਾ ਸਮਾਨ ਚੋਰੀ ਹੋਣ ਲਈ ਸਿੱਧੇ ਤੌਰ ਤੇ ਪੰਜਾਬ ਪੁਲਿਸ ਗੁਨਾਹਗਾਰ ਹੈ । ਇਨਾਂ ਵਿਚਾਰਾਂ ਦਾ ਪ੍ਰਗਟਾਵਾ ਕਿਸਾਨੀ ਮੰਗਾਂ ਨੂੰ ਲੈ ਕੇ ਪਿਛਲੇ 122 ਦਿਨਾਂ ਤੋਂ ਮਰਨ ਵਰਤ ਤੇ ਬੈਠੇ ਜਗਜੀਤ ਸਿੰਘ ਡੱਲੇਵਾਲ ਨੇ ਪਾਰਕ ਹਸਪਤਾਲ ਪਟਿਆਲਾ ਚੋਂ ਪ੍ਰੈਸ ਬਿਆਨ ਜਾਰੀ ਕਰਦਿਆਂ ਕੀਤਾ। ਉਨਾਂ ਕਿਹਾ ਕਿ ਪੁਲਿਸ ਪ੍ਰਸ਼ਾਸਨ ਵੱਲੋਂ ਖਨੌਰੀ ਮੋਰਚੇ ਤੇ 19 ਮਾਰਚ ਨੂੰ ਰਾਤ ਦੇ ਸਮੇਂ ਕਾਰਵਾਈ ਕਰਕੇ ਸੈਂਕੜੇ ਕਿਸਾਨਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਤੇ ਪੁਲਿਸ ਪ੍ਰਸ਼ਾਸਨ ਦੀ ਦੇਖਰੇਖ ਦੇ ਵਿੱਚ ਕਿਸਾਨਾਂ ਦੀਆਂ ਟਰਾਲੀਆਂ ਤੇ ਆਰਜੀ ਘਰਾਂ ਦੇ ਵਿੱਚ ਪਏ ਫਰਿਜ, ਕੂਲਰ, ਸਿਲੰਡਰ, ਭਾਂਡੇ, ਏ ਸੀ ਵਗੈਰਾ ਨੂੰ ਰਾਤੋ ਰਾਤ ਇਧਰ ਉਧਰ ਕਰ ਦਿੱਤਾ ਗਿਆ ।
ਉਨਾਂ ਕਿਹਾ ਕਿ ਬੀਤੇ ਦਿਨ ਖਨੌਰੀ ਮੋਰਚੇ ਤੇ ਪਹੁੰਚ ਕੇ ਡੀਆਈਜੀ ਮਨਦੀਪ ਸਿੰਘ ਸਿੱਧੂ ਵੱਲੋਂ ਮੀਡੀਆ ਰਾਹੀਂ ਵੱਡਾ ਦਾਅਵਾ ਕੀਤਾ ਗਿਆ ਕਿ ਖਨੌਰੀ ਮੋਰਚੇ ਤੋਂ ਕਿਸਾਨਾਂ ਦੇ ਸਾਰੇ ਟਰੈਕਟਰ, 650 ਟਰਾਲੀਆਂ, 28 ਪਾਣੀ ਵਾਲੇ ਟੈਂਕਰ ਕਿਸਾਨਾਂ ਦੇ ਸਪੁਰਦ ਕਰ ਦਿੱਤੇ ਗਏ ਹਨ। ਉਨਾਂ ਇਹ ਵੀ ਦੱਸਿਆ ਕਿ ਕਿਸਾਨਾਂ ਨੂੰ 61 ਸਿਲੰਡਰ , 20 ਫਰਿੱਜ,6 ਵਾਸਿੰਗ ਮਸ਼ੀਨਾਂ ਵੀ ਸੌਂਪੀਆਂ ਹਨ। ਸ ਡੱਲੇਵਾਲ ਨੇ ਕਿਹਾ ਕਿ ਖਨੌਰੀ ਮੋਰਚੇ ਤੇ 650 ਤੋਂ ਵੱਧ ਟਰਾਲੀਆਂ ਤੇ 500 ਦੇ ਕਰੀਬ ਆਰਜੀ ਘਰ ਬਣੇ ਹੋਏ ਸੀ ਤੇ ਲੱਗਭੱਗ ਹਰ ਟਰਾਲੀ ਤੇ ਆਰਜੀ ਘਰ ਵਿੱਚ ਫ੍ਰਿਜ, ਇਨਵਰਟਰ, ਬੈਟਰਾ, ਸਿਲੰਡਰ ,ਰਸੋਈ ਦਾ ਸਮਾਨ, ਮੰਜੇ, ਬਿਸਤਰੇ ਮੌਜੂਦ ਸੀ ।
ਉਨਾਂ ਕਿਹਾ ਕਿ ਡੀਆਈਜੀ ਮਨਦੀਪ ਸਿੰਘ ਸਿੱਧੂ ਦੇ ਬਿਆਨ ਤੋਂ ਸਪੱਸ਼ਟ ਹੁੰਦੈ ਕਿ ਕਿਸਾਨਾਂ ਨੂੰ ਉਨਾਂ ਦਾ ਸਿਰਫ ਦੋ ਕੁ ਫੀਸਦੀ ਸਮਾਨ ਹੀ ਮਿਲਿਆ ਹੈ। ਸ ਡੱਲੇਵਾਲ ਨੇ ਕਿਹਾ ਕਿ ਡੀਆਈਜੀ ਮਨਦੀਪ ਸਿੱਧੂ ਨੇ ਵੱਡਾ ਦਾਅਵਾ ਕੀਤਾ ਹੈ ਕਿ ਸਮਾਨ ਚੋਰੀ ਸਬੰਧੀ ਖਨੌਰੀ, ਪਾਤੜਾਂ ਵਗੈਰਾ ਥਾਣੇ ਵਿੱਚ ਕੋਈ ਦਰਖਾਸਤ ਨਹੀਂ ਆਈ ਜਦਕਿ ਅਸਲੀਅਤ ਇਹ ਹੈ ਕਿ ਖਨੌਰੀ ਮੋਰਚੇ ਤੇ ਕਿਸਾਨਾਂ ਦੇ ਸਮਾਨ ਲਈ ਬਣਾਏ ਡੰਪ ਤੋਂ ਇੱਕ ਪੁਲਿਸ ਮੁਲਾਜ਼ਮ ਵੱਲੋਂ ਪੁਲਿਸ ਪ੍ਰਸ਼ਾਸਨ ਦੀ ਦੇਖ ਰੇਖ ਵਿੱਚ ਗਲਤ ਪਰੂਫ ਦੇ ਕੇ ਬਰਨਾਲਾ ਜਿਲਾ ਦੇ ਪਿੰਡ ਪੱਖੋ ਕਲਾਂ ਦੇ ਕਿਸਾਨ ਦੀ ਟਰਾਲੀ ਚੋਰੀ ਕੀਤੀ ਗਈ ਹੈ ਜਿਸ ਨੂੰ ਪੁਲਿਸ ਵੱਲੋਂ ਬਰਾਮਦ ਕਰਕੇ ਪਿਛਲੇ 3-4 ਦਿਨਾਂ ਤੋਂ ਪੁਲਿਸ ਥਾਣਾ ਸਤਰਾਣਾ ਵਿਖੇ ਖੜਾਇਆ ਹੋਇਆ ।
ਹੈਰਾਨੀ ਦੀ ਗੱਲ ਹੈ ਕਿ ਪੁਲਿਸ ਪ੍ਰਸ਼ਾਸਨ ਦੋਸ਼ੀ ਪੁਲਿਸ ਮੁਲਾਜ਼ਮ ਖਿਲਾਫ ਕਾਰਵਾਈ ਕਰਨ ਅਤੇ ਕਿਸਾਨਾਂ ਦਾ ਕਰੋੜਾਂ ਰੁਪਏ ਦਾ ਸਮਾਨ ਚੋਰੀ ਹੋਣ ਦੀ ਡੁੰਘਾਈ ਨਾਲ ਜਾਂਚ ਕਰਨ ਦੀ ਬਜਾਏ ਮਾਮਲੇ ਨੂੰ ਦਬਾਉਣ ਤੇ ਲੱਗਿਆ ਹੋਇਆ ਹੈ। ਉਨਾਂ ਕਿਹਾ ਕਿ ਹੈਰਾਨੀ ਦੀ ਗੱਲ ਇਹ ਵੀ ਹੈ ਕਿ ਬੀਤੇ ਦਿਨ ਸਤਰਾਣਾ ਥਾਣਾ ਦੀ ਪੁਲਿਸ ਵੱਲੋਂ ਸਾਡੇ ਕਿਸਾਨ ਆਗੂਆਂ ਤੇ ਟਰਾਲੀ ਦੇ ਅਸਲੀ ਮਾਲਕ ਦੇ ਸਾਹਮਣੇ ਟਰਾਲੀ ਚੋਰ ਪੁਲਿਸ ਮੁਲਾਜ਼ਮ ਬਰਿੰਦਰ ਸਿੰਘ ਸਤਰਾਣਾ ਨੂੰ ਥਾਣੇ ਦੇ ਵਿੱਚ ਬੁਲਾਇਆ ਜਿੱਥੇ ਉਸਨੇ ਕਬੂਲ ਕੀਤਾ ਕਿ ਉਸ ਨੇ ਆਪਣੇ ਦੋਸਤਾਂ ਦਾ ਆਧਾਰ ਕਾਰਡ ਮੰਗਵਾ ਕੇ ਗਲਤ ਪਰੂਫ ਲਗਾ ਕੇ ਇਹ ਟਰਾਲੀ ਚੋਰੀ ਕੀਤੀ ਹੈ ਅਤੇ ਇਸ ਨੂੰ ਪਾਤੜਾਂ ਦੇ ਇਲਾਕੇ ਵਿੱਚ ਖੜਾ ਕੇ ਰੱਖਿਆ ਹੋਇਆ ਸੀ ਅਤੇ ਇਸ ਲਈ ਉਹ ਜਿੰਮੇਵਾਰ ਹੈ ਪਰ ਇਸ ਦੇ ਬਾਵਜੂਦ ਪੁਲਿਸ ਪ੍ਰਸ਼ਾਸਨ ਉਸ ਦੋਸ਼ੀ ਖਿਲਾਫ ਕੋਈ ਕਾਰਵਾਈ ਕਰਨ ਦੀ ਬਜਾਏ ਸਾਡੇ ਕਿਸਾਨ ਆਗੂਆਂ ਤੇ ਸਮਝੌਤਾ ਕਰਨ ਲਈ ਦਬਾਅ ਪਾਉਂਦਾ ਰਿਹਾ ।
ਉਨਾਂ ਕਿਹਾ ਕਿ ਭਾਵੇਂ ਅੱਜ ਕਿਸਾਨਾਂ ਦੇ ਦਬਾਅ ਹੇਠ ਪ੍ਰਸ਼ਾਸਨ ਵੱਲੋਂ ਉਸ ਪੁਲਿਸ ਮੁਲਾਜ਼ਮ ਖਿਲਾਫ ਪਰਚਾ ਦਰਜ ਕਰਨ ਦੀ ਗੱਲ ਸਾਹਮਣੇ ਆਈ ਹੈ ਪਰ ਟਰਾਲੀ ਚੋਰ ਪੁਲਿਸ ਮੁਲਾਜ਼ਮ ਨੇ ਇੱਕ ਨਹੀਂ ਬਲਕਿ ਆਪਣੇ ਕਈ ਪਹਿਚਾਣ ਵਾਲਿਆਂ ਦੇ ਆਧਾਰ ਕਾਰਡ ਵਟਸਐੱਪ ਰਾਹੀਂ ਬਿਨਾਂ ਕੁਝ ਦੱਸੇ ਮੰਗਵਾਏ ਹੋਏ ਹਨ ਜਿਸ ਕਰਕੇ ਖਦਸ਼ਾ ਹੈ ਕਿ ਇਸ ਟਰਾਲੀ ਚੋਰ ਪੁਲਿਸ ਮੁਲਾਜ਼ਮ ਨੇ ਇੱਕ ਟਰਾਲੀ ਨਹੀਂ ਬਲਕਿ ਹੋਰ ਸਾਧਨ ਵੀ ਗਲਤ ਪਰੂਫ ਲਗਾ ਕੇ ਡੰਪ ਤੋਂ ਚੋਰੀ ਕੀਤੇ ਹੋਣਗੇ । ਉਨਾਂ ਡੀਜੀਪੀ ਪੰਜਾਬ ਤੋਂ ਕਿਸਾਨਾਂ ਦਾ ਸਮਾਨ ਚੋਰੀ ਹੋਣ ਦੀ ਡੁੰਘਾਈ ਨਾਲ ਹੋਰ ਮੁਲਾਜ਼ਮਾਂ ਦੀ ਸ਼ਮੂਲੀਅਤ ਦੀ ਜਾਂਚ ਕਰਕੇ ਦੋਸ਼ੀਆਂ ਖਿਲਾਫ ਤੇ ਡੀਆਈਜੀ ਪਟਿਆਲਾ ਮਨਦੀਪ ਸਿੰਘ ਸਿੱਧੂ ਜਿਨਾਂ ਦੀ ਦੇਖਰੇਖ ਵਿੱਚ ਖਨੌਰੀ ਮੋਰਚੇ ਤੇ ਪੂਰਾ ਆਪਰੇਸ਼ਨ ਹੋਇਆ ਉਨਾਂ ਖਿਲਾਫ ਸਖਤ ਕਾਰਵਾਈ ਕੀਤੀ ਜਾਵੇ ਜੇਕਰ ਅਜਿਹਾ ਨਹੀਂ ਹੁੰਦਾ ਤਾਂ ਆਉਣ ਵਾਲੇ ਦਿਨਾਂ ਵਿੱਚ ਆਈਜੀ ਦਫਤਰ ਪਟਿਆਲਾ ਦਾ ਘਿਰਾਓ ਕਰਨ ਤੋਂ ਗਰੇਜ ਨਹੀਂ ਕੀਤਾ ਜਾਵੇਗਾ।
