ਸੀਮਾ ਸੁਰੱਖਿਆ ਬਲ (ਬੀਐੱਸਐੱਫ) ਪੱਛਮੀ ਕਮਾਂਡ ਨੇ ਸ਼ੁੱਕਰਵਾਰ ਨੂੰ ਵਿਸ਼ਵ ਵਾਤਾਵਰਣ ਦਿਵਸ ਦੇ ਅਵਸਰ ‘ਤੇ ਇੱਕ ਵਿਆਪਕ ਪੌਦੇ ਲਗਾਉਣ ਦੀ ਮੁਹਿੰਮ ਆਯੋਜਿਤ ਕਰਕੇ ਵਾਤਾਵਰਣ ਸੰਭਾਲ਼ ਅਤੇ ਟਿਕਾਊ ਵਿਕਾਸ ਪ੍ਰਤੀ ਆਪਣੀ ਪ੍ਰਤੀਬੱਧਤਾ ਨੂੰ ਦੁਹਰਾਇਆ।
ਬੀਐੱਸਐੱਫ ਪੱਛਮੀ ਕਮਾਂਡ ਦੇ
ਐਡੀਸ਼ਨਲ ਡਾਇਰੈਕਟਰ ਜਨਰਲ
ਸ਼੍ਰੀ ਸਤੀਸ਼ ਐੱਸ. ਖੰਡਾਰੇ, ਆਈਪੀਐੱਸ ਨੇ ਲਖਨੌਰ ਦੇ ਬੀਐੱਸਐੱਫ ਕੈਂਪਸ ਵਿਖੇ ਇੱਕ ਪੌਦਾ ਲਗਾ ਕੇ ਮੁਹਿੰਮ ਦਾ ਉਦਘਾਟਨ ਕੀਤਾ। ਇਸ ਅਵਸਰ ‘ਤੇ ਅਧਿਕਾਰੀਆਂ, ਜਵਾਨਾਂ, ਸਿਵਲੀਅਨ ਸਟਾਫ਼ ਅਤੇ ਪਰਿਵਾਰਕ ਮੈਂਬਰਾਂ ਨੇ ਉਤਸ਼ਾਹ ਨਾਲ ਹਿੱਸਾ ਲਿਆ।
ਮੁਹਿੰਮ ਦੇ ਤਹਿਤ ਨਿੰਮ, ਪੀਪਲ, ਅਸ਼ੋਕ ਅਤੇ ਵਿਭਿੰਨ ਫਲਦਾਰ ਰੁੱਖਾਂ ਸਹਿਤ ਸਥਾਨਕ ਪ੍ਰਜਾਤੀਆਂ ਦੇ ਪੌਦੇ ਲਗਾਏ ਗਏ। ਇਸ ਅਵਸਰ ‘ਤੇ ਐਡੀਸ਼ਨਲ ਡਾਇਰੈਕਟਰ ਜਨਰਲ ਨੇ ਵਾਤਾਵਰਣ ਸੰਭਾਲ਼ ਨੂੰ ਹਰੇਕ ਨਾਗਰਿਕ ਅਤੇ ਵਰਦੀਧਾਰੀ ਕਰਮੀ ਦੀ ਸਮੂਹਿਕ ਜ਼ਿੰਮੇਵਾਰੀ ਦੱਸਦੇ ਹੋਏ ਹਰਿਤ ਅਤੇ ਵਧੇਰੇ ਟਿਕਾਊ ਭਾਰਤ ਦੇ ਨਿਰਮਾਣ ਪ੍ਰਤੀ ਬੀਐੱਸਐੱਫ ਦੀ ਪ੍ਰਤੀਬੱਧਤਾ ਨੂੰ ਦੁਹਰਾਇਆ।
ਪੈਨ-ਬੀਐੱਸਐੱਫ ਪੱਧਰ ‘ਤੇ ਆਯੋਜਿਤ ਪੌਦੇ ਲਗਾਉਣ ਦੀ ਇਸ ਮੁਹਿੰਮ ਤਹਿਤ ਕਸ਼ਮੀਰ ਤੋਂ ਗੁਜਰਾਤ ਤੱਕ ਪੱਛਮੀ ਸੀਮਾ ‘ਤੇ ਸਥਿਤ ਸਾਰੇ ਬੀਐੱਸਐੱਫ ਫਾਰਮੇਸ਼ਨਾਂ ਅਤੇ ਬਾਰਡਰ ਆਊਟ ਪੋਸਟਾਂ (ਬੀਓਪੀ/BOPs) ਵਿੱਚ ਵੀ ਪੌਦੇ ਲਗਾਉਣ ਦੇ ਪ੍ਰੋਗਰਾਮ ਆਯੋਜਿਤ ਕੀਤੇ ਗਏ।
ਮਾਰੂਥਲ ਦੇ ਖੇਤਰਾਂ, ਕ੍ਰੀਕ ਖੇਤਰਾਂ ਅਤੇ ਬੰਜਰ ਭੂਮੀ ਨੂੰ ਵਿਸ਼ੇਸ਼ ਤੌਰ ‘ਤੇ ਮੁਹਿੰਮ ਦਾ ਕੇਂਦਰ ਬਣਾਇਆ ਗਿਆ ਤਾਕਿ ਮਾਰੂਥਲੀਕਰਣ ਅਤੇ ਮਿੱਟੀ ਦੀ ਕਟੌਤੀ ਜਿਹੀਆਂ ਵਾਤਾਵਰਣਕ ਚੁਣੌਤੀਆਂ ਨਾਲ ਪ੍ਰਭਾਵੀ ਢੰਗ ਨਾਲ ਨਜਿੱਠਿਆ ਜਾ ਸਕੇ।
ਇਸ ਮੁਹਿੰਮ ਦੇ ਦੌਰਾਨ ਪੱਛਮੀ ਸੀਮਾ ਖੇਤਰ ਵਿੱਚ 65,000 ਤੋਂ ਅਧਿਕ ਪੌਦੇ ਲਗਾਏ ਗਏ। ਐਡੀਸ਼ਨਲ ਡਾਇਰੈਕਟਰ ਜਨਰਲ ਨੇ ਕਿਹਾ ਕਿ ਬੀਐੱਸਐੱਫ ਰਾਸ਼ਟਰ ਦੀਆਂ ਸੀਮਾਵਾਂ ਦੀ ਸੁਰੱਖਿਆ ਦੀ ਆਪਣੀ ਪ੍ਰਮੁੱਖ ਜ਼ਿੰਮੇਵਾਰੀ ਦੇ ਨਾਲ-ਨਾਲ ਸਮਾਜਿਕ ਅਤੇ ਵਾਤਾਵਰਣਕ ਜ਼ਿੰਮੇਵਾਰੀਆਂ ਦੇ ਨਿਭਾਅ ਲਈ ਵੀ ਸਦਾ ਪ੍ਰਤੀਬੱਧ ਰਹੀ ਹੈ।
