ਮੈਂ 5 ਸਾਲਾਂ ਵਿੱਚ ਇੰਨਾ ਕੰਮ ਕਰਾਂਗਾ, ਜਿੰਨਾ 50 ਸਾਲਾਂ ਵਿੱਚ ਹੁੰਦਾ ਹੈ: ਟੰਡਨ
ਚੰਡੀਗਡ਼੍ਹ, 10 ਮਈ:
ਭਾਜਪਾ ਉਮੀਦਵਾਰ ਸੰਜੇ ਟੰਡਨ ਵੱਲੋਂ ਅੱਜ ਸਮੁੱਚੇ ਸ਼ਹਿਰ ਵਿੱਚ ਰੋਡਸ਼ੋਅ ਦੇ ਵਿਸ਼ਾਲ ਪ੍ਰਦਰਸ਼ਨ ਤੋਂ ਬਾਅਦ ਚੰਡੀਗਡ਼੍ਹ ਲੋਕ ਸਭਾ ਸੀਟ ਲਈ ਆਪਣੇ ਨਾਮਜ਼ਦਗੀ ਪੱਤਰ ਅਕਸ਼ੈ ਤ੍ਰਿਤੀਆ ਦੇ ਸ਼ੁਭ ਮੌਕੇ ’ਤੇ ਯੂਟੀ ਚੰਡੀਗਡ਼੍ਹ ਦੇ ਡਿਪਟੀ ਕਮਿਸ਼ਨਰ ਵਿਨੈ ਪ੍ਰਤਾਪ ਸਿੰਘ, ਆਈਏਐਸ, ਡੀਸੀ ਦਫ਼ਤਰ ਸੈਕਟਰ 17 ਦੇ ਦਫ਼ਤਰ ਵਿੱਚ ਦਾਖ਼ਲ ਕੀਤੇ ਗਏ।
ਸੰਸਦ ਮੈਂਬਰ ਕਿਰਨ ਖੇਰ, ਭਾਜਪਾ ਦੇ ਸੂਬਾ ਪ੍ਰਧਾਨ ਜਤਿੰਦਰ ਪਾਲ ਮਲਹੋਤਰਾ, ਡਾ. ਲੈਫਟੀਨੈਂਟ ਜਨਰਲ ਐਚ.ਐਸ. ਪਨਾਗ (ਸੇਵਾਮੁਕਤ)-(ਅਦਾਕਾਰਾ ਗੁਲ ਪਨਾਗ ਦੇ ਦਾਦਾ) ਅਤੇ ਰਵਿੰਦਰ ਨਾਥ ਨੇ ਸੰਜੇ ਟੰਡਨ ਦੀ ਨਾਮਜ਼ਦਗੀ ਦਾ ਪ੍ਰਸਤਾਵ ਕੀਤਾ।
ਇਸ ਮੌਕੇ ਸਾਰਿਆਂ ਦਾ ਤਹਿ ਦਿਲੋਂ ਧੰਨਵਾਦ ਕਰਦੇ ਹੋਏ, ਟੰਡਨ ਨੇ ਕਿਹਾ, ‘‘ਮੇਰੇ ਸ਼ਹਿਰ ਦੇ ਲੋਕਾਂ ਵੱਲੋਂ ਮੈਨੂੰ ਦਿੱਤੇ ਗਏ ਭਰਪੂਰ ਸਮਰਥਨ ਅਤੇ ਵਿਸ਼ਵਾਸ ਤੋਂ ਮੈਂ ਬਹੁਤ ਖੁਸ਼ ਅਤੇ ਨਿਮਰ ਹਾਂ। ਉਨ੍ਹਾਂ ਦਾ ਭਰੋਸਾ ਮੋਦੀ ਸਰਕਾਰ ਦੇ ਵਿਕਾਸ ਮਾਡਲ ਵਿੱਚ ਲੋਕਾਂ ਦੇ ਵਿਸ਼ਵਾਸ ਦਾ ਪ੍ਰਮਾਣ ਹੈ। ਅੱਜ ਮੈਂ ਲੋਕਾਂ ਦੇ ਪਿਆਰ ਅਤੇ ਸਮਰਥਨ ਦਾ ਕਰਜ਼ਦਾਰ ਹਾਂ। ਮੈਂ ਤੁਹਾਨੂੰ ਭਰੋਸਾ ਦਿਵਾਉਂਦਾ ਹਾਂ ਕਿ ਐਮਪੀ ਬਣਨ ਤੋਂ ਬਾਅਦ, ਮੈਂ 5 ਸਾਲਾਂ ਵਿੱਚ ਉਹ ਕੰਮ ਕਰਨ ਦਾ ਵਾਅਦਾ ਕਰਦਾ ਹਾਂ ਜੋ ਆਮ ਤੌਰ ’ਤੇ 50 ਸਾਲਾਂ ਵਿੱਚ ਹੁੰਦਾ ਹੈ।
ਆਪਣਾ ਰੋਡ ਸ਼ੋਅ ਸ਼ੁਰੂ ਕਰਨ ਤੋਂ ਪਹਿਲਾਂ, ਟੰਡਨ ਨੇ ਆਪਣੇ ਪਰਿਵਾਰਕ ਮੈਂਬਰਾਂ ਨਾਲ ਭਾਜਪਾ ਦੇ ਸੀਨੀਅਰ ਨੇਤਾਵਾਂ ਦੀ ਮੌਜੂਦਗੀ ਵਿੱਚ ਹਵਨ ਕੀਤਾ, ਜਿਸ ਵਿੱਚ ਹਰਿਆਣਾ ਦੇ ਨਵ-ਨਿਯੁਕਤ ਮੁੱਖ ਮੰਤਰੀ, ਨਾਇਬ ਸਿੰਘ ਸੈਣੀ, ਵੀ ਕਮਲਮ, ਸੈਕਟਰ 33, ਚੰਡੀਗਡ਼੍ਹ ਵਿਖੇ ਹੋਏ ਸਮਾਗਮ ਵਿੱਚ ਸ਼ਾਮਲ ਹੋਏ। ਭਾਜਪਾ ਦੇ ਸੂਬਾ ਪ੍ਰਧਾਨ ਜਤਿੰਦਰ ਪਾਲ ਮਲਹੋਤਰਾ, ਉੱਪ ਪ੍ਰਧਾਨ ਡਾ. ਸ਼ਕਤੀ ਪ੍ਰਕਾਸ਼ ਦੇਵਸ਼ਾਲੀ, ਵੀ ‘ਹਵਨ’ ਵਿਚ ਮੌਜੂਦ ਸਨ।
ਹਵਨ ਤੋਂ ਬਾਅਦ, ਟੰਡਨ ਨੇ ਆਪਣੇ ‘ਵਿਜੇ ਰੱਥ’ ’ਤੇ ਇਕ ਵਿਸ਼ਾਲ ਜਲੂਸ ਦੀ ਸ਼ੁਰੂਆਤ ਕੀਤੀ, ਜਿਹਡ਼ਾ ਸੀਨੀਅਰ ਭਾਜਪਾ ਨੇਤਾਵਾਂ ਦੇ ਨਾਲ ਚੰਡੀਗਡ਼੍ਹ ਦੇ ਸੈਕਟਰ 33 ਸਥਿਤ ਪਾਰਟੀ ਦਫਤਰ ਤੋਂ ਨਿਕਲਿਆ। ਯਾਤਰਾ ਦੀ ਸ਼ੁਰੂਆਤ ਗੁਰਦੁਆਰਾ ਸ਼੍ਰੀ ਗੁਰੂ ਤੇਗ ਬਹਾਦਰ ਸਾਹਿਬ ਸੈਕਟਰ 34 ਵਿਖੇ ਹੋਈ, ਜਿੱਥੇ ਸ੍ਰੀ ਟੰਡਨ, ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ, ਜਤਿੰਦਰ ਪਾਲ ਮਲਹੋਤਰਾ ਦੇ ਨਾਲ ਰੋਡ ਸ਼ੋਅ ਸ਼ੁਰੂ ਕਰਨ ਤੋਂ ਪਹਿਲਾਂ ਮੱਥਾ ਟੇਕ ਕੇ ਰੱਬੀ ਆਸ਼ੀਰਵਾਦ ਲਈ।
ਇਸ ਦਿਨ ਦੀ ਖਾਸ ਗੱਲ ਟੰਡਨ ਦਾ ਯਾਦਗਾਰੀ ਰੋਡ ਸ਼ੋਅ ਸੀ, ਜੋ ਕਿ ਸੱਭਿਆਚਾਰਕ ਅਨੋਖੇ ਅੰਦਾਜ਼ ਨਾਲ ਭਰਪੂਰ ਸੀ ਜਿਸ ਨੇ ਸ਼ਹਿਰ ਦੇ ਵਸਨੀਕਾਂ ਦੇ ਦਿਲਾਂ ਨੂੰ ਮੋਹ ਲਿਆ। ਰੋਡ ਸ਼ੋਅ ਸੱਭਿਆਚਾਰਕ ਜਸ਼ਨ ਦਾ ਇੱਕ ਜੀਵੰਤ ਪ੍ਰਦਰਸ਼ਨ ਸੀ ਜਿਸ ਵਿੱਚ ਉੱਤਰਾਖੰਡ, ਪੰਜਾਬ ਅਤੇ ਹਿਮਾਚਲ ਸਮੇਤ ਵੱਖ-ਵੱਖ ਭਾਈਚਾਰਿਆਂ ਦੇ ਲੋਕਾਂ ਨੇ ਆਪਣੇ ਸੱਭਿਆਚਾਰਕ ਪਹਿਰਾਵੇ ਵਿੱਚ ਸਜੇ ਸੱਭਿਆਚਾਰਕ ਵਿਭਿੰਨਤਾ ਦੇ ਅਮੀਰ ਵਿਰਸੇ ਦਾ ਪ੍ਰਦਰਸ਼ਨ ਕੀਤਾ।
ਵੱਖ-ਵੱਖ ਸੈਕਟਰਾਂ ਵਿੱਚੋਂ ਲੰਘਦੇ ਹੋਏ ਸ੍ਰੀ ਟੰਡਨ ਨੇ ਸੈਕਟਰ 37 ਵਿੱਚ ਪਰਸ਼ੂਰਾਮ ਭਵਨ ਵਿੱਚ ਮੱਥਾ ਟੇਕਿਆ ਅਤੇ ਸੈਕਟਰ 30 ਵਿੱਚ ਸੱਤਿਆ ਸਾਈਂ ਬਾਬਾ ਮੰਦਰ, ਬਾਬਾ ਬਾਲਕ ਨਾਥ ਮੰਦਰ ਅਤੇ ਸੈਕਟਰ 29 ਚੰਡੀਗਡ਼੍ਹ ਵਿੱਚ ਸਾਈਂ ਮੰਦਰ ਵਿੱਚ ਜਾ ਕੇ ਆਸ਼ੀਰਵਾਦ ਲਿਆ।
ਰੋਡ ਸ਼ੋਅ ਨੂੰ ਸੈਕਟਰ 24, 22, 21 ਅਤੇ 20 ਦੀਆਂ ਮਾਰਕੀਟ ਐਸੋਸੀਏਸ਼ਨਾਂ ਵੱਲੋਂ ਭਰਵਾਂ ਹੁੰਗਾਰਾ ਮਿਲਿਆ ਜਿਨ੍ਹਾਂ ਨੇ ਟੰਡਨ ਦੀ ਉਮੀਦਵਾਰੀ ਲਈ ਆਪਣਾ ਨਿੱਘਾ ਸੁਆਗਤ ਕੀਤਾ ਅਤੇ ਉਨ੍ਹਾਂ ਦੇ ਸਮਰਥਨ ਦਾ ਵਾਅਦਾ ਕੀਤਾ।
ਗਡ਼੍ਹਵਾਲ ਭਵਨ, ਸੈਕਟਰ 27 ਵਿਖੇ, ਉੱਤਰਾਖੰਡ ਦੇ ਲੋਕਾਂ ਨੇ ਟੰਡਨ ਦਾ ਫੁੱਲਾਂ ਦੀ ਵਰਖਾ ਨਾਲ ਸਵਾਗਤ ਕੀਤਾ ਅਤੇ ਉਨ੍ਹਾਂ ਨੂੰ ਉੱਤਰਾਖੰਡ ਦੀ ਰਵਾਇਤੀ ਟੋਪੀ ਭੇਟ ਕੀਤੀ, ਚੰਡੀਗਡ਼੍ਹ ਲੋਕ ਸਭਾ ਚੋਣ ਲਈ ਉਨ੍ਹਾਂ ਦੀਆਂ ਨਿੱਘੀਆਂ ਸ਼ੁਭਕਾਮਨਾਵਾਂ ਦਿੱਤੀਆਂ। ਇਸ ਤੋਂ ਇਲਾਵਾ, ਵੱਖ-ਵੱਖ ਮਾਰਕੀਟ ਐਸੋਸੀਏਸ਼ਨਾਂ ਜਿੱਥੇ ਜਲੂਸ ਕੱਢਿਆ ਗਿਆ, ਨੇ ਟੰਡਨ ਦਾ ਸਵਾਗਤ ਕੀਤਾ ਅਤੇ ਆਉਣ ਵਾਲੀਆਂ ਚੰਡੀਗਡ਼੍ਹ ਲੋਕ ਸਭਾ ਚੋਣਾਂ ਲਈ ਆਪਣੀ ਇਕਜੁੱਟਤਾ ਦਾ ਪ੍ਰਗਟਾਵਾ ਕੀਤਾ।
ਰੋਡ ਸ਼ੋਅ ਸੈਕਟਰ 34, 35, 36, 37, 24, 23, 22, 21, 19, 30, 29, 28, 27, 19, 18 ਤੋਂ ਹੁੰਦਾ ਹੋਇਆ ਸੈਕਟਰ 17 ਦੇ ਡੀਸੀ ਦਫ਼ਤਰ ਪਹੁੰਚਿਆ। ਖਾਸ ਤੌਰ ’ਤੇ, ਸਵੱਛਤਾ ਪ੍ਰਤੀ ਆਪਣੀ ਵਚਨਬੱਧਤਾ ਨੂੰ ਉਜਾਗਰ ਕਰਦੇ ਹੋਏ ਅਤੇ ਮੋਦੀ ਦੇ ‘ਸਵੱਛ ਭਾਰਤ ਅਭਿਆਨ’ ਦੀ ਭਾਵਨਾ ਨੂੰ ਪ੍ਰਗਟ ਕਰਦੇ ਹੋਏ, ਭਾਜਪਾ ਮੈਂਬਰਾਂ ਨੇ ਰੋਡ ਸ਼ੋਅ ਦੇ ਸਮੁੱਚੇ ਰਸਤੇ ’ਤੇ ਸਫਾਈ ਅਭਿਆਨ ਵੀ ਚਲਾਇਆ।
