ਉਹਨਾਂ ਨੇ ਕਿਹਾ ਕਿ ਉਪਭੋਗਤਾਵਾਦ ਦੇ ਸੱਭਿਆਚਾਰ ਨੇ ਬੰਦੇ ਦੇ ਸਭ ਤੋਂ ਪਵਿੱਤਰ ਜਜ਼ਬੇ ਪਿਆਰ ਨੂੰ ਵੀ ਕਰੂਪ ਕਰ ਦਿੱਤਾ ਹੈ ਅਤੇ ਪਿਆਰ ਨੂੰ ਪਾਸ਼ਵੀ ਪੱਧਰ ਤੱਕ ਲਿਆ ਕੇ ਖੜਾ ਦਿੱਤਾ ਹੈ। ਜਿੱਥੇ ਬੰਦਾ ਜਿਸਮਾਨੀ ਭੁੱਖ ਨੂੰ ਹੀ ਪਿਆਰ ਸਮਝਣ ਲੱਗ ਪਿਆ ਹੈ। ਉਹਨਾਂ ਨੇ ਅੱਗੇ ਕਿਹਾ ਕਿ ਕਿੱਸਿਆਂ ਦੇ ਨਾਇਕਾਂ ਦੇ ਜੀਵਨ ਅਤੇ ਉਹਨਾਂ ਦਾ ਪਿਆਰ ਦਾ ਜਜ਼ਬਾ ਪਵਿੱਤਰ ਸੀ ਅਤੇ ਨਵੀਂ ਪੀੜੀ ਨੂੰ ਉਹਨਾਂ ਤੋਂ ਸੇਧ ਲੈ ਕੇ ਇਸ ਜਜ਼ਬੇ ਨੂੰ ਮਾਨਵ ਜੀਵਨ ਦੀ ਉਸਾਰੀ ਲਈ ਤੋਰਨਾ ਚਾਹੀਦਾ ਹੈ।। ਇਸ ਤੋਂ ਅਗਲੇ ਬੁਲਾਰੇ ਡਾ. ਸੁਖਦੇਵ ਸਿੰਘ ਸਿਰਸਾ ਸਨ। ਉਹਨਾਂ ਨੇ ਪੰਜਾਬੀ ਕਿੱਸਿਆਂ ਦੇ ਵਿੱਚ ਨਾਬਰੀ ਅਤੇ ਬੰਦੇ ਦੀ ਬੰਦਿਆਈ ਨੂੰ ਬਚਾਉਣ ਦੇ ਉਪਰਾਲਿਆਂ ਦੀ ਗੱਲ ਕੀਤੀ ਉਹਨਾਂ ਨੇ ਕਿਹਾ ਕਿ ਕਿਸੇ ਵੀ ਥਾਂ ਕਿਸੇ ਵੀ ਸਮੇਂ ਕਦੇ ਵੀ ਸੱਤਾਧਾਰੀ ਧਿਰ ਜਾਂ ਬੱਜਰ ਰਾਜ ਸ਼ਕਤੀ ਹਮੇਸ਼ਾ ਹੀ ਮਨੁੱਖਾਂ ਨੂੰ ਆਪਣੇ ਅਨੁਸਾਰ ਢਾਲਣ ਵਿੱਚ ਲੱਗੀ ਰਹਿੰਦੀ ਹੈ; ਇਹੋ ਕਾਰਨ ਹੈ ਕਿ ਇਹ ਨਾਇਕ ਉਸ ਜਾਬਰ ਸਟੇਟ ਦੇ ਜ਼ੁਲਮ ਅਤੇ ਰਾਜੇ ਵਿਰੁੱਧ ਉੱਠਦੇ ਹਨ। ਉਹਨਾਂ ਨੇ ਕਿੱਸਿਆਂ ਦੇ ਸਾਰੇ ਚਿਹਨ ਪ੍ਰਬੰਧ ਨੂੰ ਸੱਤਾ ਅਤੇ ਸੱਤਾ ਤੋਂ ਬਾਗ਼ੀ ਹੋਏ ਲੋਕਾਂ ਦੀ ਜੀਵਨ ਕਹਾਣੀ ਦੇ ਰੂਪ ਵਿੱਚ ਦੱਸਿਆ ।
ਸੈਮੀਨਾਰ ਦੇ ਦੂਸਰੇ ਸੈਸ਼ਨ ਵਿੱਚ ਨਰਤਕੀ ਡਾਕਟਰ ਅਰਸ਼ਦੀਪ ਕੌਰ ਭੱਟੀ ਵੱਲੋਂ ਕੱਥਕ ਨ੍ਰਿਤ ਦੀ ਪੇਸ਼ਕਾਰੀ ਕੀਤੀ ਗਈ।ਇਸ ਲਈ ਉਹਨਾਂ ਨੇ ਇਸ ਅਦਾਰੇ ਦਾ ਵਿਸ਼ੇਸ਼ ਧੰਨਵਾਦ ਕੀਤਾ ਇਸ ਤੋਂ ਇਲਾਵਾ ਮੰਚ ਦਾ ਸੰਚਾਲਨ ਡਾ. ਜਸਵਿੰਦਰ ਸਿੰਘ ਮੁਖੀ ਪੰਜਾਬੀ ਵਿਭਾਗ ਅਤੇ ਡਾਕਟਰ ਤੇਜਿੰਦਰ ਸਿੰਘ ਅਸਿਸਟੈਂਟ ਪ੍ਰੋਫੈਸਰ ਪੰਜਾਬੀ ਵਿਭਾਗ ਵੱਲੋਂ ਕੀਤਾ ਗਿਆ।। ਸ. ਕੁਲਬੀਰ ਸਿੰਘ ਜੀ ਨੇ ਕਿਹਾ ਕਿ ਭਵਿੱਖ ਵਿੱਚ ਵੀ ਅਸੀਂ ਇਹੋ ਜਿਹੇ ਸੈਮੀਨਾਰਾਂ ਦਾ ਆਯੋਜਨ ਕਰਦੇ ਰਹਾਂਗੇ ਤਾਂ ਜੋ ਆਉਣ ਵਾਲੀ ਪੀੜੀ ਬੁੱਧੀਜੀਵੀਆਂ ਦੇ ਵਿਚਾਰਾਂ ਤੋਂ ਲਾਹਾ ਲੈ ਸਕੇ। ਇਸ ਸਮਾਗਮ ਵਿੱਚ ਸਿੱਖ ਐਜੂਕੇਸ਼ਨਲ ਸੋਸਾਇਟੀ ਦੇ ਪ੍ਰਧਾਨ ਸਰਦਾਰ ਗੁਰਦੇਵ ਸਿੰਘ ਹੋਰਾਂ ਨੇ ਉਚੇਚੇ ਤੌਰ ਤੇ ਸ਼ਿਰਕਤ ਕੀਤੀ ਅਤੇ ਪੰਜਾਬ ਪੰਜਾਬੀ ਅਤੇ ਪੰਜਾਬੀਅਤ ਲਈ ਕੀਤੇ ਜਾਂਦੇ ਅਜਿਹੇ ਸੈਮੀਨਾਰਾਂ ਦੀ ਮਹੱਤਤਾ ਬਾਰੇ ਚਾਨਣਾ ਪਾਇਆ ਉਹਨਾਂ ਕਿਹਾ ਕਿ ਇਹੋ ਜਿਹੇ ਸਮਾਗਮਾਂ ਨਾਲ ਹੀ ਮਾਂ ਭਾਸ਼ਾ ਦੀ ਸੱਚੀ ਸੁੱਚੀ ਸੇਵਾ ਹੋ ਸਕਦੀ ਹੈ।ਇਸ ਸਮਾਗਮ ਵਿਚ ਉੱਘੇ ਕਹਾਣੀਕਾ, ਕਵੀ ਗੁਲ ਚੌਹਾਨ, ਕਹਾਣੀਕਾਰ ਬਲੀਜੀਤ, ਕਵੁੀ ਜਗਦੀਪ ਸਿੱਧੂ, ਗੀਤਕਾਰ ਸੁਰਜੀਤ ਸੁਮਨ, ਸ਼ਾਇਰ ਸੁਰਜੀਤ ਜੱਜ, ਆਲੋਚਕ ਡਾ. ਧਨਵੰਤ ਕੌਰ, ਬਲਜੀਤ ਕੌਰ ਆਦਿ ਨੇ ਸ਼ਿਰਕਤ ਕੀਤੀ।
