ਚੰਡੀਗੜ੍ਹ, 04.09.2025 – ਊਰਜਾ ਪ੍ਰਬੰਧਨ ਸੈੱਲ (ਈਐੱਮਸੀ/EMC) / ਰਾਜ ਮਨੋਨੀਤ ਏਜੰਸੀ (ਐੱਸਡੀਏ/SDA), ਇੰਜੀਨੀਅਰਿੰਗ ਵਿਭਾਗ, ਯੂ.ਟੀ. ਚੰਡੀਗੜ੍ਹ ਨੇ ਕਨਫੈਡਰੇਸ਼ਨ ਆਵ੍ ਇੰਡੀਅਨ ਇੰਡਸਟ੍ਰੀ, ਸੈਕਟਰ 31, ਚੰਡੀਗੜ੍ਹ ਵਿਖੇ “ਇੰਡਸਟ੍ਰੀ ਅਤੇ ਡਿਸਕੌਮ ਵਿੱਚ ਇੰਡਸਟ੍ਰੀਅਲ ਡੀਕਾਰਬੋਨਾਇਜ਼ੇਸ਼ਨ ਅਤੇ ਊਰਜਾ ਦਕਸ਼ਤਾ” ‘ਤੇ ਇੱਕ ਦਿਨ ਦੀ ਵਰਕਸ਼ਾਪ ਦਾ ਆਯੋਜਨ ਕੀਤਾ।
ਵਰਕਸ਼ਾਪ ਦਾ ਉਦਘਾਟਨ ਕਰਦੇ ਹੋਏ, ਇੰਜੀਨੀਅਰ ਸੀ.ਬੀ. ਓਝਾ, ਚੀਫ਼ ਇੰਜੀਨੀਅਰ, ਯੂ.ਟੀ. ਚੰਡੀਗੜ੍ਹ ਨੇ ਉੱਨਤ ਟੈਕਨੋਲੋਜੀਆਂ ਅਤੇ ਊਰਜਾ-ਦਕਸ਼ ਅਭਿਆਸਾਂ ਨੂੰ ਅਪਣਾ ਕੇ ਉਦਯੋਗਿਕ ਖੇਤਰ ਨੂੰ ਡੀਕਾਰਬੋਨਾਇਜ਼ ਕਰਨ ਦੀ ਤੁਰੰਤ ਜ਼ਰੂਰਤ ‘ਤੇ ਜ਼ੋਰ ਦਿੱਤਾ। ਉਨ੍ਹਾਂ ਨੇ 2030 ਤੱਕ ਕਾਰਬਨ-ਨਿਊਟ੍ਰਲ ਸ਼ਹਿਰ ਅਤੇ 2047 ਤੱਕ ਇੱਕ ਨੈੱਟ-ਜ਼ੀਰੋ ਸ਼ਹਿਰ ਬਣਨ ਲਈ ਚੰਡੀਗੜ੍ਹ ਦੀ ਪ੍ਰਤੀਬੱਧਤਾ ਨੂੰ ਦੁਹਰਾਇਆ, ਜਿਸ ਵਿੱਚ ਉਦਯੋਗ ਖੇਤਰ ਦੀ ਅਤਿਅੰਤ ਮਹੱਤਵਪੂਰਨ ਭੂਮਿਕਾ ਹੋਵੇਗੀ।
ਇਸ ਅਵਸਰ ‘ਤੇ ਸ਼੍ਰੀ ਪਵਿੱਤਰ ਸਿੰਘ, ਪੀਸੀਐੱਸ, ਡਾਇਰੈਕਟਰ ਇੰਡਸਟ੍ਰੀਜ਼, ਚੰਡੀਗੜ੍ਹ ਪ੍ਰਸ਼ਾਸਨ, ਨੇ ਟਿਕਾਊ ਉਦਯੋਗਿਕ ਵਿਕਾਸ ਦੀ ਮਹੱਤਤਾ ‘ਤੇ ਪ੍ਰਕਾਸ਼ ਪਾਇਆ, ਉਦਯੋਗਾਂ ਨੂੰ ਰਾਸ਼ਟਰੀ ਜਲਵਾਯੂ ਲਕਸ਼ਾਂ ਦਾ ਸਮਰਥਨ ਕਰਦੇ ਹੋਏ ਪ੍ਰਤੀਯੋਗੀ ਬਣੇ ਰਹਿਣ ਲਈ ਸਵੱਛ ਟੈਕਨੋਲੋਜੀਆਂ, ਊਰਜਾ-ਦਕਸ਼ ਉਪਕਰਣਾਂ ਅਤੇ ਅਖੁੱਟ ਊਰਜਾ ਨੂੰ ਅਪਣਾਉਣ ਦੀ ਤਾਕੀਦ ਕੀਤੀ। ਸ਼੍ਰੀ ਅਰੁਣ ਕੁਮਾਰ ਵਰਮਾ, ਡਾਇਰੈਕਟਰ, ਚੰਡੀਗੜ੍ਹ ਪਾਵਰ ਡਿਸਟ੍ਰੀਬਿਊਸ਼ਨ ਲਿਮਿਟਿਡ (ਸੀਪੀਡੀਐੱਲ/CPDL) ਨੇ ਉਦਯੋਗਿਕ ਡੀਕਾਰਬੋਨਾਇਜ਼ੇਸ਼ਨ ਵਿੱਚ ਬਿਜਲੀ ਖੇਤਰ ਦੀ ਮੁੱਖ ਭੂਮਿਕਾ ‘ਤੇ ਬਲ ਦਿੰਦੇ ਹੋਏ ਕਿਹਾ ਕਿ ਸਵੱਛ ਅਤੇ ਟਿਕਾਊ ਪਿਰਤਾਂ ਨੂੰ ਅਪਣਾਉਣ ਦੇ ਲਈ ਭਰੋਸੇਯੋਗ ਅਤੇ ਆਧੁਨਿਕ ਊਰਜਾ ਬੁਨਿਆਦੀ ਢਾਂਚੇ ਦੀ ਜ਼ਰੂਰਤ ਹੈ।
ਵਰਕਸ਼ਾਪ ਦੇ ਤਕਨੀਕੀ ਸੈਸ਼ਨਾਂ ਵਿੱਚ ਉਦਯੋਗਿਕ ਡੀਕਾਰਬੋਨਾਇਜ਼ੇਸ਼ਨ ਦੇ ਮਾਰਗ, ਇਮਾਰਤਾਂ ਵਿੱਚ ਊਰਜਾ ਦਕਸ਼ਤਾ, ਐੱਚਵੀਏਸੀ ਅਤੇ ਲਾਇਟਿੰਗ ਵਿੱਚ ਲਾਗਤ-ਬੱਚਤ ਦੀਆਂ ਸੰਭਾਵਨਾਵਾਂ, ਐੱਮਐੱਸਐੱਮਈ ਡੀਕਾਰਬੋਨਾਇਜ਼ੇਸ਼ਨ ਵਿੱਚ ਚੁਣੌਤੀਆਂ, ਅਤੇ ਕੂਲਿੰਗ ਟਾਵਰਾਂ, ਮੋਟਰਾਂ ਅਤੇ ਹੋਰ ਉਪਕਰਣਾਂ ਵਿੱਚ ਦਕਸ਼ਤਾ ਵਿੱਚ ਵਾਧੇ ਜਿਹੇ ਵਿਸ਼ਿਆਂ ‘ਤੇ ਵਿਸਤ੍ਰਿਤ ਚਰਚਾ ਹੋਈ। ਨਾਲ ਹੀ, ਸੈਸ਼ਨਾਂ ਵਿੱਚ ਆਈਐੱਸਓ/ISO 50001 ਫ੍ਰੇਮਵਰਕ ‘ਤੇ ਵੀ ਵਿਚਾਰ-ਵਟਾਂਦਰਾ ਕੀਤਾ ਗਿਆ, ਜਿਸ ਨਾਲ ਢਾਂਚਾਗਤ ਊਰਜਾ ਪ੍ਰਬੰਧਨ ਪ੍ਰਣਾਲੀਆਂ ਨੂੰ ਲਾਗੂ ਕਰਨ ਵਿੱਚ ਇਸ ਦੇ ਮਹੱਤਵ ਨੂੰ ਰੇਖਾਂਕਿਤ ਕੀਤਾ ਗਿਆ।
ਵਰਕਸ਼ਾਪ ਵਿੱਚ 50 ਤੋਂ ਅਧਿਕ ਡੈਲੀਗੇਟਾਂ ਨੇ ਹਿੱਸਾ ਲਿਆ, ਜਿਨ੍ਹਾਂ ਵਿੱਚ ਐੱਮਐੱਸਐੱਮਈ, ਡਿਸਕੌਮ, ਸਰਕਾਰੀ ਵਿਭਾਗ, ਤਕਨੀਕੀ ਮਾਹਰ ਅਤੇ ਅਕਾਦਮਿਕ ਜਗਤ ਦੇ ਪ੍ਰਤੀਨਿਧ ਸ਼ਾਮਲ ਸਨ। ਪ੍ਰਤੀਭਾਗੀਆਂ ਨੇ ਸਰਗਰਮੀ ਨਾਲ ਵਿਚਾਰ-ਵਟਾਂਦਰਾ ਅਤੇ ਅਨੁਭਵ ਸਾਂਝੇ ਕੀਤੇ।
ਸਮਾਗਮ ਦਾ ਸਮਾਪਨ ਉਦਯੋਗਾਂ ਨੂੰ ਇਸ ਸਮੂਹਿਕ ਸੱਦੇ ਦੇ ਨਾਲ ਹੋਇਆ ਕਿ ਉਹ ਟਿਕਾਊ ਉਤਪਾਦਨ ਅਭਿਆਸਾਂ ਨੂੰ ਜਲਦੀ ਅਪਣਾਉਣ ਅਖੁੱਟ ਊਰਜਾ ਦਾ ਉਪਯੋਗ ਵਧਾਉਣ ਅਤੇ ਊਰਜਾ-ਦਕਸ਼ ਟੈਕਨੋਲੋਜੀਆਂ ਦਾ ਏਕੀਕਰਨ ਕਰਨ। ਇਸ ਵਰਕਸ਼ਾਪ ਨੇ ਉਦਯੋਗਿਕ ਡੀਕਾਰਬੋਨਾਇਜ਼ੇਸ਼ਨ ਦੇ ਖੇਤਰ ਵਿੱਚ ਇਨੋਵੇਸ਼ਨ ਅਤੇ ਸਹਿਯੋਗ ਨੂੰ ਹੁਲਾਰਾ ਦੇਣ ਵਿੱਚ ਚੰਡੀਗੜ੍ਹ ਪ੍ਰਸ਼ਾਸਨ ਦੀ ਲੀਡਰਸ਼ਿਪ ਭੂਮਿਕਾ ਨੂੰ ਮੁੜ ਸਥਾਪਿਤ ਕੀਤਾ।
