*ਡਾ. ਹਰਚਰਨ ਸਿੰਘ ਯਾਦਗਾਰੀ ਰੰਗਮੰਚ ਉਤਸਵ ਮੌਕੇ ਸਿਰਮੌਰ ਨਾਟਕਕਾਰ ਸਾਹਿਬ ਸਿੰਘ ਦੇ ਨਾਟਕ ” ਮਰਦ ਬੱਚਾ ” ਦਾ ਸ਼ਾਨਦਾਰ ਨਾਟਕ ਪਾਠ..

ਪੰਜਾਬ ਕਲਾ ਪਰਿਸ਼ਦ ਚੰਡੀਗੜ੍ਹ ਅਤੇ ਸੰਗੀਤ ਨਾਟਕ ਅਕੈਡਮੀ ਪੰਜਾਬ ਚੰਡੀਗੜ੍ਹ ਵੱਲੋਂ ਕਰਵਾਏ ਜਾ ਰਹੇ ਨਾਟਕਕਾਰ ਡਾ. ਹਰਚਰਨ ਸਿੰਘ ਨੂੰ ਸਮਰਪਿਤ 11 ਰੋਜ਼ਾ ਰੰਗਮੰਚ ਉਤਸਵ 2026 ਦੇ ਪੰਜਵੇਂ ਦਿਨ ” ਅਦਾਕਾਰ ਮੰਚ ਮੋਹਾਲੀ” ਦੇ ਨਿਰਦੇਸ਼ਕ ਤੇ ਨਾਟਕਕਾਰ ਡਾ. ਸਾਹਿਬ ਸਿੰਘ ਵਲੋਂ ਪੰਜਾਬੀ ਸਮਾਜ ਦੀ ਪ੍ਰਚਲਿਤ ‘ਮਰਦ ਬੱਚਾ’ ਦੀ ਧਾਰਨਾ ਦਾ ਦਿਲਚਸਪ ਤਰੀਕੇ ਨਾਲ਼ ਵਿਸ਼ਲੇਸ਼ਣ ਕੀਤਾ ਗਿਆ। ਡਾ. ਸਾਹਿਬ ਸਿੰਘ ਦਾ ਇਹ ਨਾਟਕ ਪਾਠ ਬਹੁਤ ਸਾਰੇ ਸਵਾਲ ਖੜ੍ਹੇ ਕਰ ਗਿਆl
ਕੀ ਝਟਪਟ ਅਪਣੀ ਹਾਓਮੇ ਨੂੰ ਪੱਠੇ ਪਾਉਣ ਲਈ ਕੀਤਾ ਫੈਸਲਾ ਜਾਂ ਕਾਰਵਾਈ ਇੱਕ ਮਰਦ ਦੀ ਪਰਿਭਾਸ਼ਾ ਹੋ ਸਕਦੀ ਹੈ ਜਾਂ ਇਹ ਕਾਹਲ ਆਉਣ ਵਾਲੀ ਪੀੜ੍ਹੀ ਦੇ ਰਾਹ ਚ’ ਕੰਢੇ ਬੀਜ ਸਕਦੀ ਹੈ? ਇਹ ਸਵਾਲ ਇਸ ਨਾਟਕ ਦੇ ਆਰ ਪਾਰ ਚੱਲਦਾ ਹੈ l ਮਿਰਜ਼ਾ ਸਾਹਿਬਾਂ ਦੇ ਕਿੱਸੇ ਵਿੱਚ ਕੱਢ ਕੇ ਲਿਆਉਣ ਤੋਂ ਬਾਅਦ ਜੰਡ ਥੱਲੇ ਸੌਂ ਜਾਣ ਦੇ ਫੈਸਲੇ ਨੂੰ ਇਹ ਨਾਟਕ ਵੰਗਾਰਦਾ ਹੈ ਤੇ ਸਵਾਲ ਖੜ੍ਹਾ ਕਰਦਾ ਹੈ ਕਿ ਅਜਿਹੀ ਸਥਿਤੀ ਵਿੱਚ ਕੋਈ ਵੀ ਔਰਤ ਸਹਿਜ ਕਿਵੇਂ ਹੋ ਸਕਦੀ ਹੈ? ਨਾਟਕ ਦਾ ਮੁੱਖ ਪਾਤਰ ਜਗੀਰ ਸਿੰਘ ਅਣਖ ਨੂੰ ਤਰਜੀਹ ਦਿੰਦਾ ਹੈ ਪਰ ਪਤਨੀ ਧਰਮ ਕੌਰ ਦੇ ਸੂਖਮ ਜਜ਼ਬਾਤ ਨਹੀਂ ਸਮਝਦਾ..ਅਜਿਹੇ ਵਿਚ ਉਹਨਾਂ ਦਾ ਬੱਚਾ ਜ਼ੋਰਾਵਰ ਕਿਸ ਤਰ੍ਹਾਂ ਦੀ ਸ਼ਰੀਰਕ – ਮਾਨਸਿਕ ਸਥਿਤੀ ਦਾ ਸਾਹਮਣਾ ਕਰ ਰਿਹਾ ਹੈl ਨਾਟਕ ਤੀਖਣ ਢੰਗ ਨਾਲ ਸਵਾਲ ਖੜ੍ਹੇ ਕਰਦੇ ਹੈ ਸਾਡੇ ਯੁੱਧ ਮੋਰਚੇ ਸੰਘਰਸ਼ ਦੀ ਕਾਹਲ ਕਾਰਨ ਠੁੱਸ ਤਾਂ ਨਹੀਂ ਹੋ ਜਾਂਦੇ? ਨਾਟਕ ਇਹਨਾਂ ਸਵਾਲਾਂ ਦੇ ਰੂਬਰੂ ਹੁੰਦਾ ਹੈ l ਸਾਹਿਬ ਸਿੰਘ ਦਾ ਇਹ ਨਾਟਕ ਪੰਜਾਬੀ ਮਰਦ ਮਾਨਸਿਕਤਾ ਨੂੰ ਮੁੜ ਸੋਚਣ ਲਈ ਮਜਬੂਰ ਕਰਦਾ ਹੈ l ਇਸ ਮੌਕੇ ਹਾਜ਼ਰ ਮੁੱਖ ਮਹਿਮਾਨ ਸਾਬਕਾ ਮੇਅਰ ਤੇ ਕਲਾ ਪਰਿਸ਼ਦ ਦੇ ਚੇਅਰ -ਪਰਸਨ ਬੀਬੀ ਹਰਜਿੰਦਰ ਕੌਰ ਨੇ ਇਸ ਨਾਟਕ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਇਹ ਨਾਟਕ ਸੱਚਮੁੱਚ ਮਰਦ ਦੀ ਖੋਖਲੀ ਮਾਨਸਿਕਤਾ ਦੇ ਅੱਗੇ ਚੱਟਾਨ ਵਾਂਗ ਖੜ੍ਹਾ ਹੁੰਦਾ ਹੈ I
ਆਰਟ ਕੌਂਸਲ ਪੰਜਾਬ ਚੰਡੀਗੜ੍ਹ ਦੇ ਚੇਅਰਮੈਨ ਸਵਰਨਜੀਤ ਸਵੀ ਅਤੇ ਰੰਗਮੰਚ ਉਤਸਵ ਦੇ ਕੋਆਰਡੀਨੇਟਰ ਰਾਜਵਿੰਦਰ ਸਮਰਾਲਾ ਨੇ ਨਾਟਕ ਦੀ ਭਾਵਪੂਰਕ ਪੇਸ਼ਕਾਰੀ ਦੀ ਵਧਾਈ ਦਿੰਦਿਆਂ ਨਾਟਕਕਾਰ ਦਾ ਸਨਮਾਨ ਕੀਤਾ I