ਚੰਡੀਗੜ੍ਹ, 27 ਮਈ, 2025:
ਜ਼ਿਲ੍ਹਾ ਮੈਜਿਸਟ੍ਰੇਟ, ਚੰਡੀਗੜ੍ਹ ਦੇ ਨਿਰਦੇਸ਼ਾਂ ਦੇ ਤਹਿਤ, 27.05.25 ਨੂੰ ਰਾਸ਼ਟਰੀ ਰਾਜਮਾਰਗ-05 ਦੇ ਨਾਲ ਰਾਇਟ ਆਵ੍ ਵੇਅ (ROW) ‘ਤੇ ਅਣਅਧਿਕਾਰਤ ਕਬਜ਼ੇ ਹਟਾਉਣ ਲਈ ਇੱਕ ਵਿਸ਼ੇਸ਼ ਢਾਹੁਣ ਅਤੇ ਸਫ਼ਾਈ ਮੁਹਿੰਮ (demolition and clearance drive) ਸਫ਼ਲਤਾਪੂਰਵਕ ਚਲਾਈ ਗਈ, ਜਿਸ ਵਿੱਚ ਹੱਲੋਮਾਜਰਾ ਲਾਇਟ ਪੁਆਇੰਟ ਤੋਂ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਦੀ ਸੀਮਾ (ਜ਼ੀਰਕਪੁਰ ਵਾਲੇ ਪਾਸੇ) ਤੱਕ ਦਾ ਹਿੱਸਾ ਸ਼ਾਮਲ ਸੀ।
ਲਗਭਗ 2.5 ਕਿਲੋਮੀਟਰ ਦੀ ਦੂਰੀ ਨੂੰ ਕਵਰ ਕਰਨ ਵਾਲੀ ਇਹ ਮੁਹਿੰਮ, ਇੰਜੀਨੀਅਰਿੰਗ ਵਿਭਾਗ, ਚੰਡੀਗੜ੍ਹ ਪੁਲਿਸ ਅਤੇ ਹੋਰ ਸਬੰਧਿਤ ਅਧਿਕਾਰੀਆਂ ਦੇ ਤਾਲਮੇਲ ਵਾਲੇ ਯਤਨਾਂ ਨਾਲ ਸੁਚਾਰੂ ਅਤੇ ਕੁਸ਼ਲਤਾਪੂਰਵਕ ਚਲਾਈ ਗਈ। ਇਸ ਮੁਹਿੰਮ ਦਾ ਮੁੱਖ ਉਦੇਸ਼ ਜਨਤਕ ਜ਼ਮੀਨ ਨੂੰ ਦੁਬਾਰਾ ਪ੍ਰਾਪਤ ਕਰਨਾ ਅਤੇ ਪ੍ਰਵਾਨਿਤ ਮਾਸਟਰ ਪਲਾਨ ਜਿਵੇਂ ਕਿ ਸਾਇਕਲ ਟ੍ਰੈਕ ਦੇ ਅਨੁਸਾਰ ਬੁਨਿਆਦੀ ਢਾਂਚੇ ਦੇ ਨਿਰਵਿਘਨ ਵਿਕਾਸ ਅਤੇ ਵਿਸਤਾਰ ਨੂੰ ਸੁਨਿਸ਼ਚਿਤ ਕਰਨਾ ਸੀ।
ਇਸ ਮਹੱਤਵਪੂਰਨ ਕੌਰੀਡੋਰ ‘ਤੇ ਕਬਜ਼ੇ ਨਾ ਸਿਰਫ਼ ਵਿਕਾਸ ਗਤੀਵਿਧੀਆਂ ਵਿੱਚ ਰੁਕਾਵਟ ਪਾਉਂਦੇ ਸਨ, ਬਲਕਿ ਗੰਭੀਰ ਟ੍ਰੈਫਿਕ ਅਤੇ ਸੁਰੱਖਿਆ ਚਿੰਤਾਵਾਂ ਵੀ ਪੈਦਾ ਕਰਦੇ ਸਨ। ਸ਼ਹਿਰੀ ਯੋਜਨਾਬੰਦੀ ਅਤੇ ਜਨਤਕ ਹਿਤ ਦੇ ਸਿਧਾਂਤਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਕਬਜ਼ੇਦਾਰਾਂ ਨੂੰ ਪਹਿਲੇ ਹੀ ਵਾਰ-ਵਾਰ ਨੋਟਿਸ ਅਤੇ ਸਵੈ-ਇੱਛਾ ਨਾਲ ਹਟਾਉਣ ਦੇ ਲਈ ਮੌਕੇ ਦਿੱਤੇ ਗਏ ਸਨ। ਹਾਲਾਂਕਿ, ਅਨੁਪਾਲਨ ਨਾ ਕਰਨ ‘ਤੇ, ਪ੍ਰਸ਼ਾਸਨ ਨੇ ਦ੍ਰਿੜ੍ਹ ਪਰ ਸ਼ਾਂਤੀਪੂਰਨ ਕਾਰਵਾਈ ਕੀਤੀ।
ਅਧਿਕਾਰੀਆਂ, ਪੁਲਿਸ ਕਰਮਚਾਰੀਆਂ ਅਤੇ ਫੀਲਡ ਸਟਾਫ਼ ਦੀ ਇੱਕ ਸਮਰਪਿਤ ਟੀਮ ਨੇ ਇਹ ਸੁਨਿਸ਼ਚਿਤ ਕੀਤਾ ਕਿ ਮੁਹਿੰਮ ਜਨਤਕ ਵਿਵਸਥਾ ਵਿੱਚ ਕਿਸੇ ਵੀ ਵਿਘਨ ਤੋਂ ਬਿਨਾ ਚਲਾਈ ਜਾਵੇ। ਟ੍ਰੈਫਿਕ ਦੇ ਪ੍ਰਵਾਹ ਨੂੰ ਬਣਾਈ ਰੱਖਣ ਅਤੇ ਯਾਤਰੀਆਂ ਅਤੇ ਨੇੜਲੇ ਨਿਵਾਸੀਆਂ ਨੂੰ ਘੱਟੋ-ਘੱਟ ਅਸੁਵਿਧਾ ਸੁਨਿਸ਼ਚਿਤ ਕਰਨ ਲਈ ਜ਼ਰੂਰੀ ਲੌਜਿਸਟਿਕਲ ਵਿਵਸਥਾ ਪਹਿਲ ਤੋਂ ਹੀ ਕੀਤੀ ਗਈ ਸੀ।
ਮੁੜ ਪ੍ਰਾਪਤ ਖੇਤਰ ਨੂੰ ਹੁਣ ਚੰਡੀਗੜ੍ਹ ਪ੍ਰਸ਼ਾਸਨ ਦੀ ਪ੍ਰਵਾਨਿਤ ਬੁਨਿਆਦੀ ਢਾਂਚਾ ਯੋਜਨਾ ਦੇ ਅਨੁਸਾਰ ਵਿਕਸਿਤ ਕੀਤਾ ਜਾਵੇਗਾ, ਜਿਸ ਵਿੱਚ ਸੜਕ ਚੌੜੀ ਕਰਨਾ, ਸੇਵਾ ਲੇਨਾਂ ਦਾ ਨਿਰਮਾਣ, ਪੈਦਲ ਚਲਣ ਵਾਲੇ ਰਸਤੇ ਅਤੇ ਕੌਰੀਡੋਰ ਦਾ ਸੁੰਦਰੀਕਰਨ ਸ਼ਾਮਲ ਹੈ। ਇਹ ਪਹਿਲ ਵਾਹਨਾਂ ਦੀ ਭੀੜ ਨੂੰ ਘੱਟ ਕਰਨ, ਸੜਕ ਸੁਰੱਖਿਆ ਵਿੱਚ ਸੁਧਾਰ ਕਰਨ ਅਤੇ ਐੱਨਐੱਚ-05 (NH-05) ਰੂਟ ਦੇ ਨਾਲ ਸ਼ਹਿਰੀ ਪਰਿਦ੍ਰਿਸ਼ ਨੂੰ ਵਧਾਉਣ ਵੱਲ ਇੱਕ ਮਹੱਤਵਪੂਰਨ ਕਦਮ ਹੈ।
ਜ਼ਿਲ੍ਹਾ ਪ੍ਰਸ਼ਾਸਨ ਜਨਤਕ ਜ਼ਮੀਨ ਦੀ ਪਵਿੱਤਰਤਾ ਬਣਾਈ ਰੱਖਣ ਲਈ ਆਪਣੀ ਪ੍ਰਤੀਬੱਧਤਾ ਦੀ ਪੁਸ਼ਟੀ ਕਰਦਾ ਹੈ ਅਤੇ ਨਾਗਰਿਕਾਂ ਨੂੰ ਸਰਕਾਰੀ ਪ੍ਰਾਪਰਟੀ ‘ਤੇ ਕਬਜ਼ਾ ਕਰਨ ਤੋਂ ਬਚਣ ਦੀ ਤਾਕੀਦ ਕਰਦਾ ਹੈ। ਇੱਕ ਸਾਫ਼, ਸੁਰੱਖਿਅਤ ਅਤੇ ਵਧੇਰੇ ਸੰਗਠਿਤ ਸ਼ਹਿਰ ਪ੍ਰਾਪਤ ਕਰਨ ਵਿੱਚ ਜਨਤਕ ਸਹਿਯੋਗ ਮਹੱਤਵਪੂਰਨ ਹੈ।
