“ਪੰਜਾਬ ਦੀਆਂ ਅਸਾਮੀਆਂ ਦੀ ਨਿਲਾਮੀ”: ਭਾਜਪਾ ਵੱਲੋਂ ਪੀਸੀਐੱਸ ਨਤੀਜਿਆਂ ਦੀ ਸੀਬੀਆਈ ਜਾਂਚ ਦੀ ਮੰਗ
ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਪੰਜਾਬ ਦੇ ਪ੍ਰਧਾਨ ਕੇਵਲ ਸਿੰਘ ਢਿੱਲੋਂ ਨੇ ਅੱਜ ‘ਆਪ’ ਸਰਕਾਰ ਅਧੀਨ ਪੰਜਾਬ ਸਿਵਲ ਸਰਵਿਸਿਜ਼ (ਪੀਸੀਐੱਸ) ਪ੍ਰੀਖਿਆ ਵਿੱਚ ਹੋਏ ਪੂਰਵ-ਨਿਯੋਜਿਤ ਭਰਤੀ ਘੁਟਾਲੇ ਦਾ ਪਰਦਾਫਾਸ਼ ਕੀਤਾ। ਢਿੱਲੋਂ ਨੇ ਕਿਹਾ ਕਿ 4 ਨਵੰਬਰ ਨੂੰ ਐਲਾਨਿਆ ਗਿਆ ਪੀਸੀਐੱਸ ਮੇਨਜ਼ ਦਾ ਨਤੀਜਾ ਉੱਚ ਪੁਲਿਸ ਅਧਿਕਾਰੀਆਂ, ਨੌਕਰਸ਼ਾਹਾਂ ਅਤੇ ‘ਆਪ’ ਆਗੂਆਂ ਦੇ ਬੱਚਿਆਂ ਤੇ ਰਿਸ਼ਤੇਦਾਰਾਂ ਨੂੰ ਐਡਜਸਟ ਕਰਨ ਦੀ ਇੱਕ ਸੰਸਥਾਗਤ ਸਾਜ਼ਿਸ਼ ਸੀ।
ਢਿੱਲੋਂ ਨੇ ਕਿਹਾ, “ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਮੈਰਿਟ ‘ਤੇ ਨੌਕਰੀਆਂ ਦੇਣ ਦਾ ਵਾਅਦਾ ਕੀਤਾ ਸੀ, ਪਰ ਉਨ੍ਹਾਂ ਦੀ ਹਕੂਮਤ ਨੇ ਪੰਜਾਬ ਦੀਆਂ ਪ੍ਰਸ਼ਾਸਕੀ ਅਸਾਮੀਆਂ ਨਿਲਾਮ ਕਰ ਦਿੱਤੀਆਂ ਹਨ। ਯੋਗ ਉਮੀਦਵਾਰਾਂ ਨੂੰ ਗ਼ੈਰ-ਪ੍ਰਮਾਣਿਤ ਰਿਸਰਚ ਸਕਾਲਰਾਂ ਕੋਲੋਂ ਵਿਉਂਤਬੱਧ ਫੇਲ੍ਹ ਕਰਵਾਇਆ ਗਿਆ, ਜਦਕਿ ਵੀਆਈਪੀਜ਼ ਦੇ ਰਿਸ਼ਤੇਦਾਰਾਂ ਨੂੰ ਚੋਣਾਂ ਬਖ਼ਸ਼ੀਆਂ ਗਈਆਂ। ਇਸ ਸ਼ਰੇਆਮ ਭ੍ਰਿਸ਼ਟਾਚਾਰ ਤੋਂ ਦੁਖੀ ਹੋ ਕੇ ਲੁਧਿਆਣਾ ਦੇ ਇੱਕ ਪ੍ਰੀਖਿਆਰਥੀ ਨੇ ਖ਼ੁਦਕੁਸ਼ੀ ਕਰ ਲਈ ਅਤੇ ਸੂਬਾ ਪੁਲਿਸ ਨੇ ਰੋਸ ਨੂੰ ਦਬਾਉਣ ਲਈ ਪਰਿਵਾਰ ਕੋਲੋਂ ਜ਼ਬਰੀ ਕਾਹਲੀ ਵਿੱਚ ਅੰਤਿਮ ਸਸਕਾਰ ਕਰਵਾ ਦਿੱਤਾ। ਇਸ ਦੁਖਾਂਤ ਲਈ ਮਾਨ ਸਰਕਾਰ ਸਿੱਧੇ ਜ਼ਿੰਮੇਵਾਰ ਹੈ।”
ਢਿੱਲੋਂ ਨੇ ਨਤੀਜਿਆਂ ਦੀਆਂ ਹੈਰਾਨਕੁਨ ਬੇਨਿਯਮੀਆਂ ਉਜਾਗਰ ਕੀਤੀਆਂ:
ਗ਼ੈਰ-ਹਾਜ਼ਰ ਉਮੀਦਵਾਰ ਪਾਸ: ਗ਼ੈਰ-ਹਾਜ਼ਰ ਉਮੀਦਵਾਰਾਂ ਦੇ ਰੋਲ ਨੰਬਰ ਸਫ਼ਲ ਐਲਾਨੇ ਗਏ।
ਅੰਕੜਿਆਂ ਵਿੱਚ ਹੇਰਾਫੇਰੀ: ਕੁੱਲ ਚੋਣਾਂ ਵਿੱਚੋਂ 24% ਤੋਂ ਵੱਧ ਉਮੀਦਵਾਰ ਇੱਕੋ ਕੇਂਦਰ ਵਿੱਚੋਂ ਆਏ, ਜਿਨ੍ਹਾਂ ਵਿੱਚੋਂ ਖ਼ਾਸ ਕਮਰਿਆਂ ਦੀ ਪਾਸ ਦਰ 46% ਤੱਕ ਦਰਜ ਕੀਤੀ ਗਈ।
ਲਗਾਤਾਰ ਰੋਲ ਨੰਬਰਾਂ ਦੀ ਚੋਣ: ਲਗਾਤਾਰ ਰੋਲ ਨੰਬਰਾਂ ਵਾਲੇ 26 ਕਲੱਸਟਰਾਂ ਵਿੱਚ ਕੁੱਲ 86 ਉਮੀਦਵਾਰ ਪਾਸ ਹੋਏ।
ਬੇਲਗਾਮ ਭਾਈ-ਭਤੀਜਾਵਾਦ: ਉੱਚ ਅਧਿਕਾਰੀਆਂ ਅਤੇ ‘ਆਪ’ ਆਗੂਆਂ ਦੇ ਬੱਚਿਆਂ ਤੇ ਰਿਸ਼ਤੇਦਾਰਾਂ ਦੀ ਚੋਣ ਹੋਈ ਹੈ।
ਕੋਚਿੰਗ ਮਾਫ਼ੀਆ ਅਤੇ ਅਫ਼ਸਰਸ਼ਾਹੀ ਗਠਜੋੜ: ਵਪਾਰਕ ਕੋਚਿੰਗ ਸੰਸਥਾਵਾਂ ਦੇ ਮੁਖੀਆਂ ਦੇ ਰਿਸ਼ਤੇਦਾਰ ਚੁਣੇ ਗਏ, ਜਦਕਿ ਪ੍ਰੀਖਿਆ ਅਧਿਕਾਰੀਆਂ ਨਾਲ ਜੁੜੇ ਇੱਕ ਪ੍ਰਮੁੱਖ ਕੋਚਿੰਗ ਸੈਂਟਰ ਵਿੱਚੋਂ ਚੋਣਾਂ ਦਾ ਅਸਧਾਰਨ ਜਮਾਵੜਾ ਮਿਲਿਆ।
ਨਿਯਮਾਂ ਦੀ ਉਲੰਘਣਾ: 331 ਅਸਾਮੀਆਂ ਲਈ ਸਿਰਫ਼ 751 ਉਮੀਦਵਾਰ ਸ਼ਾਰਟਲਿਸਟ ਕੀਤੇ ਗਏ (ਲਾਜ਼ਮੀ 3 ਗੁਣਾ ਇੰਟਰਵਿਊ ਅਨੁਪਾਤ ਨੂੰ ਦਰਕਿਨਾਰ ਕਰਦਿਆਂ), ਅਤੇ ਰਸੂਖ਼ਦਾਰ ਪਰਿਵਾਰਾਂ ਨੂੰ ਬਚਾਉਣ ਲਈ ਨਾਮ ਲੁਕਾਏ ਗਏ।
ਢਿੱਲੋਂ ਨੇ 17 ਨਵੰਬਰ ਨੂੰ ਹੋਣ ਵਾਲੀ ਦਸਤਾਵੇਜ਼ਾਂ ਦੀ ਪੜਤਾਲ ਤੁਰੰਤ ਰੋਕਣ, ਪੀਪੀਐੱਸਸੀ ਚੇਅਰਮੈਨ ਦੇ ਅਸਤੀਫ਼ੇ ਅਤੇ ਅਦਾਲਤ ਦੀ ਨਿਗਰਾਨੀ ਹੇਠ ਸੀਬੀਆਈ ਜਾਂਚ ਦੀ ਮੰਗ ਕੀਤੀ।
