ਚੰਡੀਗੜ੍ਹ, 19 ਸਤੰਬਰ, 2025: ਵਰਲਡ ਟੂਰਿਜ਼ਮ ਵੀਕ ਦੇ ਜਸ਼ਨਾਂ ਦੇ ਹਿੱਸੇ ਵਜੋਂ, ਚੰਡੀਗੜ੍ਹ ਉਦਯੋਗਿਕ ਅਤੇ ਟੂਰਿਜ਼ਮ ਵਿਕਾਸ ਕਾਰਪੋਰੇਸ਼ਨ (CITCO/ਸਿਟਕੋ) 22 ਸਤੰਬਰ ਤੋਂ 29 ਸਤੰਬਰ, 2025 ਤੱਕ “ਚੰਡੀਗੜ੍ਹ ਇਨ ਫੋਕਸ” ਸਿਰਲੇਖ ਵਾਲਾ ਇੱਕ ਫੋਟੋਗ੍ਰਾਫੀ ਮੁਕਾਬਲਾ ਆਯੋਜਿਤ ਕਰ ਰਹੀ ਹੈ। ਇਹ ਮੁਕਾਬਲਾ ਫੋਟੋਗ੍ਰਾਫੀ ਦੇ ਸ਼ੌਕੀਨਾਂ ਅਤੇ ਨਾਗਰਿਕਾਂ ਨੂੰ ਸ਼ਹਿਰ ਦੇ ਆਪਣੇ ਮਨਪਸੰਦ ਟੂਰਿਸਟ ਸਥਲਾਂ ਜਾਂ ਸਥਾਨਾਂ ਦੀਆਂ ਤਸਵੀਰਾਂ ਕਲਿੱਕ ਕਰਕੇ, ਉਨ੍ਹਾਂ ਨੂੰ ਇੱਕ ਢੁਕਵਾਂ ਸਿਰਲੇਖ ਦੇ ਕੇ, ਅਤੇ ਉਨ੍ਹਾਂ ਨੂੰ ਸਿਟਕੋ (CITCO) ਦੇ ਅਧਿਕਾਰਿਤ ਇੰਸਟਾਗ੍ਰਾਮ ਪੇਜ @citcoofficial.chandigarh ‘ਤੇ ਟੈਗ ਕਰਕੇ ਚੰਡੀਗੜ੍ਹ ਦੀ ਸੁੰਦਰਤਾ ਨੂੰ ਕੈਪਚਰ ਕਰਨ ਲਈ ਸੱਦਾ ਦਿੰਦਾ ਹੈ।
ਆਕਰਸ਼ਕ ਇਨਾਮਾਂ ਦਾ ਐਲਾਨ ਕੀਤਾ ਗਿਆ ਹੈ: ਪਹਿਲਾ ਇਨਾਮ ਹੋਟਲ ਮਾਊਂਟਵਿਊ ਵਿਖੇ ਇੱਕ ਕਪਲ ਬੁਫੇ, ਦੂਸਰਾ ਇਨਾਮ ਹੋਟਲ ਸ਼ਿਵਾਲਿਕਵਿਊ ਵਿਖੇ ਇੱਕ ਕਪਲ ਬੁਫੇ, ਤੀਸਰਾ ਇਨਾਮ ਹੋਟਲ ਪਾਰਕਵਿਊ ਵਿਖੇ ਇੱਕ ਕਪਲ ਬੁਫੇ, ਅਤੇ ਕੰਸੋਲੇਸ਼ਨ ਇਨਾਮ ਸਿਟਕੋ (CITCO) ਦੇ ਆਇਕੌਨਿਕ ਬੋਟ ਹਾਊਸ ਕੈਫੇ, ਸੁਖਨਾ ਝੀਲ ਵਿਖੇ ਇੱਕ ਕਪਲ ਕੌਫੀ ਟ੍ਰੀਟ ਹੈ।
ਇਸ ਮੌਕੇ ‘ਤੇ ਬੋਲਦੇ ਹੋਏ, ਸਿਟਕੋ (CITCO) ਦੇ ਮੈਨੇਜਿੰਗ ਡਾਇਰੈਕਟਰ, ਸ਼੍ਰੀ ਹਰੀ ਕਲਿੱਕਟ ਆਈਏਐੱਸ ਨੇ ਕਿਹਾ, “ਵਰਲਡ ਟੂਰਿਜ਼ਮ ਵੀਕ ਸੱਭਿਆਚਾਰ, ਪਰਾਹੁਣਚਾਰੀ ਅਤੇ ਭਾਈਚਾਰਕ ਭਾਗੀਦਾਰੀ ਦਾ ਜਸ਼ਨ ਹੈ। ‘ਚੰਡੀਗੜ੍ਹ ਇਨ ਫੋਕਸ’ ਮੁਕਾਬਲੇ ਦੇ ਨਾਲ, ਸਿਟਕੋ (CITCO) ਦਾ ਉਦੇਸ਼ ਨਾਗਰਿਕਾਂ ਅਤੇ ਸੈਲਾਨੀਆਂ ਨੂੰ ਉਨ੍ਹਾਂ ਦੇ ਲੈਂਸ ਰਾਹੀਂ ਸ਼ਹਿਰ ਦੇ ਸੁਹਜ ਨੂੰ ਪ੍ਰਦਰਸ਼ਿਤ ਕਰਨ ਵਿੱਚ ਸ਼ਾਮਲ ਕਰਨਾ ਹੈ।” ਉਨ੍ਹਾਂ ਅੱਗੇ ਕਿਹਾ ਕਿ ਸਿਟਕੋ (CITCO) ਹਮੇਸ਼ਾ ਟੂਰਿਜ਼ਮ ਨੂੰ ਉਤਸ਼ਾਹਿਤ ਕਰਨ ਅਤੇ ਸੈਲਾਨੀਆਂ ਦੇ ਅਨੁਭਵ ਨੂੰ ਵਧਾਉਣ ਲਈ ਯਤਨਸ਼ੀਲ ਰਹੀ ਹੈ, ਇਸ ਪਹਿਲ ਨੂੰ ਚੰਡੀਗੜ੍ਹ ਨੂੰ ਇੱਕ ਪਸੰਦੀਦਾ ਟੂਰਿਸਟ ਡੈਸਟੀਨੇਸ਼ਨ (ਮੰਜ਼ਿਲ) ਵਜੋਂ ਸਥਾਪਿਤ ਕਰਨ ਵੱਲ ਇੱਕ ਹੋਰ ਕਦਮ ਬਣਾਉਂਦਾ ਹੈ।
