“ਪਹਿਲਾਂ ਮੁਲਾਜ਼ਮਾਂ ਦਾ DA ਰੋਕਿਆ, ਫਿਰ ਮੀਟਿੰਗ ਰੱਦ ਕੀਤੀ ਤੇ ਹੁਣ ਕਾਰਵਾਈ ਦੀ ਧਮਕੀ। ਇਹ ਸਰਕਾਰ ਨਹੀਂ, ਮਨਮਾਨੀ ਤੇ ਧੱਕੇਸ਼ਾਹੀ ਹੈ”
“ਮਹਾ ਹੜਤਾਲ ਵਾਲੇ ਦਿਨ ਗੈਰਹਾਜ਼ਰ ਮੁਲਾਜ਼ਮਾਂ ਦੀਆਂ ਸੂਚੀਆਂ ਬਣਾ ਕੇ ਕਾਰਵਾਈ ਦੇ ਹੁਕਮ। ਇਨਕਲਾਬ ਦੀ ਧਰਤੀ ਨੂੰ ਧਮਕੀਆਂ ਨਾਲ ਨਹੀਂ ਦਬਾਇਆ ਜਾ ਸਕਦਾ”
ਚੰਡੀਗੜ੍ਹ, 27 ਅਗਸਤ: ਸੀਨੀਅਰ ਕਾਂਗਰਸੀ ਆਗੂ ਅਤੇ ਸਾਬਕਾ ਪੰਜਾਬ ਕੈਬਨਿਟ ਮੰਤਰੀ ਵਿਜੈ ਇੰਦਰ ਸਿੰਗਲਾ ਨੇ ਪੰਜਾਬ ਦੇ ਮੁਲਾਜ਼ਮਾਂ ਅਤੇ ਪੈਨਸ਼ਨਰਾਂ ਵੱਲੋਂ ਕੀਤੀ ਜਾ ਰਹੀ ਮਹਾ ਹੜਤਾਲ ਦਾ ਪੂਰਾ ਸਮਰਥਨ ਕਰਦਿਆਂ ਕਿਹਾ ਕਿ ਆਪਣੇ ਬਣਦੇ ਹੱਕਾਂ ਲਈ ਆਵਾਜ਼ ਚੁੱਕ ਰਹੇ ਮੁਲਾਜ਼ਮਾਂ ਨਾਲ AAP ਸਰਕਾਰ ਦਾ ਰਵੱਈਆ ਬੇਹੱਦ ਮਨਮਾਨਾ, ਤਾਨਾਸ਼ਾਹੀ ਅਤੇ ਧਮਕਾਉਣ ਵਾਲਾ ਹੈ।
“ਮੁਲਾਜ਼ਮ ਤੇ ਪੈਨਸ਼ਨਰ ਆਪਣਾ ਬਣਦਾ DA ਮੰਗ ਰਹੇ ਹਨ। ਸਰਕਾਰ ਨੇ ਪਹਿਲਾਂ ਮੀਟਿੰਗ ਬੁਲਾਈ, ਫਿਰ ਰੱਦ ਕਰ ਦਿੱਤੀ। ਹੁਣ ਮੁੱਖ ਮੰਤਰੀ ਕਹਿੰਦੇ ਹਨ ਕਿ ਹੜਤਾਲ ਤੇ ਗੱਲਬਾਤ ਇਕੱਠੇ ਨਹੀਂ ਚੱਲ ਸਕਦੇ। ਇਸ ਦੇ ਨਾਲ ਹੀ ਅੱਜ ਗੈਰਹਾਜ਼ਰ ਮੁਲਾਜ਼ਮਾਂ ਦੀਆਂ ਸੂਚੀਆਂ ਤਿਆਰ ਕਰਕੇ ਕਾਰਵਾਈ ਕਰਨ ਦੇ ਹੁਕਮ ਜਾਰੀ ਕਰ ਦਿੱਤੇ ਗਏ। ਪਹਿਲਾਂ ਹੱਕ ਰੋਕੋ, ਫਿਰ ਗੱਲਬਾਤ ਬੰਦ ਕਰੋ ਤੇ ਹੁਣ ਸਰਕਾਰੀ ਤੰਤਰ ਰਾਹੀਂ ਡਰਾਓ। ਇਹ ਸਰਕਾਰ ਚਲਾਉਣਾ ਨਹੀਂ, ਆਪਣੀ ਮਨਮਰਜ਼ੀ ਨਾਲ ਧੱਕੇਸ਼ਾਹੀ ਕਰਨਾ ਹੈ,” ਸਿੰਗਲਾ ਨੇ ਕਿਹਾ।
ਉਨ੍ਹਾਂ ਕਿਹਾ ਕਿ ਮੁੱਖ ਮੰਤਰੀ ਨੂੰ ਇਹ ਸਮਝਣਾ ਚਾਹੀਦਾ ਹੈ ਕਿ ਸ਼ਾਂਤਮਈ ਰੋਸ ਲੋਕਤੰਤਰ ਦਾ ਹਿੱਸਾ ਹੈ।
“ਪੰਜਾਬ ਕਿਸੇ ਅੱਗੇ ਸਿਰ ਝੁਕਾਉਣ ਵਾਲੀ ਧਰਤੀ ਨਹੀਂ। ਇਹ ਇਨਕਲਾਬਾਂ ਦੀ ਧਰਤੀ ਹੈ। ਇਸ ਮਿੱਟੀ ਨੇ ਅੰਗਰੇਜ਼ ਸਾਮਰਾਜ ਦੇ ਖ਼ਿਲਾਫ਼ ਲੜਾਈ ਲੜੀ ਹੈ ਅਤੇ ਕਿਸਾਨਾਂ ਨੇ ਆਪਣੇ ਹੱਕਾਂ ਲਈ ਲੜ ਕੇ ਤਿੰਨ ਕਾਲੇ ਖੇਤੀ ਕਾਨੂੰਨ ਵਾਪਸ ਕਰਵਾਏ ਹਨ। ਪੰਜਾਬ ਦਾ ਜਿਗਰਾ ਕਿਸੇ ਸਰਕਾਰ ਦੇ ਹੁਕਮਾਂ ਨਾਲ ਨਹੀਂ ਚੱਲਦਾ।”
ਸਿੰਗਲਾ ਨੇ ਕਿਹਾ ਕਿ ਸਰਕਾਰ ਪੰਜਾਬ ਦੇ ਮੁਲਾਜ਼ਮਾਂ ਅਤੇ ਪੈਨਸ਼ਨਰਾਂ ਦੇ ਸਬਰ ਨੂੰ ਉਨ੍ਹਾਂ ਦੀ ਕਮਜ਼ੋਰੀ ਨਾ ਸਮਝੇ।
“ਗੱਲਬਾਤ ਤੇ ਸ਼ਾਂਤਮਈ ਸੰਘਰਸ਼ ਇਕੱਠੇ ਚੱਲ ਸਕਦੇ ਹਨ। ਪਰ ਧਮਕੀਆਂ ਤੇ ਚੰਗਾ ਸ਼ਾਸਨ ਇਕੱਠੇ ਨਹੀਂ ਚੱਲ ਸਕਦੇ। ਜਿਹੜੀ ਸਰਕਾਰ ਆਪਣੇ ਹੀ ਮੁਲਾਜ਼ਮਾਂ ਨੂੰ ਆਪਣਾ ਹੱਕ ਮੰਗਣ ’ਤੇ ਧਮਕਾਏ, ਮੀਟਿੰਗਾਂ ਰੱਦ ਕਰੇ ਅਤੇ ਫਿਰ ਗੱਲਬਾਤ ਲਈ ਸ਼ਰਤਾਂ ਲਾਵੇ, ਉਹ ਲੋਕਤੰਤਰ ਦੀ ਗੱਲ ਨਹੀਂ ਕਰ ਸਕਦੀ।”
ਉਨ੍ਹਾਂ ਕਿਹਾ ਕਿ ਪੰਜਾਬ ਦੇ ਲੋਕਾਂ ਨੇ ਹੁਣ ਵਾਅਦਿਆਂ ਦੀ ਥਾਂ ਕੰਮ ਅਤੇ ਡਿਲਿਵਰੀ ਮੰਗਣੀ ਸ਼ੁਰੂ ਕਰ ਦਿੱਤੀ ਹੈ।
“ਲੋਕ ਆਖ਼ਰ ਡਿਲਿਵਰੀ ਮੰਗਦੇ ਹਨ। ਮੁਲਾਜ਼ਮ ਆਪਣਾ ਹੱਕ ਮੰਗ ਰਹੇ ਹਨ। ਪੈਨਸ਼ਨਰ ਆਪਣਾ ਹੱਕ ਮੰਗ ਰਹੇ ਹਨ। ਸਰਕਾਰ ਕੋਲ ਧਮਕੀਆਂ ਲਈ ਨਹੀਂ, ਹੱਲ ਲਈ ਤਾਕਤ ਹੋਣੀ ਚਾਹੀਦੀ ਹੈ। ਬਣਦਾ DA ਦਿਓ, ਬਿਨਾਂ ਸ਼ਰਤ ਗੱਲਬਾਤ ਕਰੋ ਤੇ ਮਸਲਾ ਹੱਲ ਕਰੋ।”
“ਪੰਜਾਬ ਨੇ ਵੱਡੇ-ਵੱਡੇ ਸਾਮਰਾਜਾਂ ਅੱਗੇ ਸਿਰ ਨਹੀਂ ਝੁਕਾਇਆ। ਇਹ ਸਰਕਾਰੀ ਧਮਕੀਆਂ ਅੱਗੇ ਵੀ ਨਹੀਂ ਝੁਕੇਗਾ। ਇਹ ਇਨਕਲਾਬ ਦੀ ਧਰਤੀ ਹੈ। ਇੱਥੇ ਹੱਕ ਦੀ ਆਵਾਜ਼ ਨੂੰ ਦਬਾਇਆ ਨਹੀਂ ਜਾ ਸਕਦਾ। ਪੰਜਾਬ ਬੋਲੇਗਾ, ਪੰਜਾਬ ਲੜੇਗਾ ਅਤੇ ਪੰਜਾਬ ਆਪਣਾ ਹੱਕ ਲੈ ਕੇ ਰਹੇਗਾ।”
ਸਿੰਗਲਾ ਨੇ ਕਿਹਾ ਕਿ ਕਾਂਗਰਸ ਪਾਰਟੀ ਪੰਜਾਬ ਦੇ ਮੁਲਾਜ਼ਮਾਂ ਅਤੇ ਪੈਨਸ਼ਨਰਾਂ ਦੇ ਆਪਣੇ ਹੱਕਾਂ ਅਤੇ ਬਣਦੇ ਬਕਾਏ ਲਈ ਸੰਘਰਸ਼ ਵਿੱਚ ਉਨ੍ਹਾਂ ਦੇ ਨਾਲ ਡਟ ਕੇ ਖੜ੍ਹੀ ਹੈ।
