ਖੁਰਾਕ ਪ੍ਰੋਸੈਸਿੰਗ ਵਿਭਾਗ ਦੀ ਪ੍ਰਮੁੱਖ ਸਕੱਤਰ ਰਾਖੀ ਗੁਪਤਾ ਭੰਡਾਰੀ ਨੇ ਕਿਹਾ—ਪੰਜਾਬ ਤੋਂ ਸਿਰਫ਼ ਖਰੀਦਦਾਰੀ ਨਾ ਕਰੋ, ਪੰਜਾਬ ਨਾਲ ਮਿਲ ਕੇ ਨਵੇਂ ਉਤਪਾਦ ਤੇ ਬ੍ਰਾਂਡ ਤਿਆਰ ਕਰੋ
ਚੰਡੀਗੜ੍ਹ, 18 ਸਤੰਬਰ। ਪੰਜਾਬ ਦੀ ਪਛਾਣ ਸਿਰਫ਼ ਕਣਕ-ਝੋਨੇ ਅਤੇ ਕੱਚੇ ਖੇਤੀ ਉਤਪਾਦਾਂ ਤੱਕ ਸੀਮਤ ਨਹੀਂ ਰਹਿਣੀ ਚਾਹੀਦੀ। ਖੇਤਾਂ ਦੀ ਤਾਕਤ ਅਤੇ ਪੰਜਾਬੀ ਖਾਣ-ਪੀਣ ਦੀ ਅਮੀਰ ਵਿਰਾਸਤ ਨੂੰ ਪ੍ਰੋਸੈਸਡ ਫੂਡ, ਨਵੇਂ ਉਤਪਾਦਾਂ ਅਤੇ ਗਲੋਬਲ ਬ੍ਰਾਂਡਾਂ ਵਿੱਚ ਬਦਲਣ ਦੀ ਲੋੜ ਹੈ। ਇਹ ਗੱਲ ਪੰਜਾਬ ਸਰਕਾਰ ਦੇ ਖੁਰਾਕ ਪ੍ਰੋਸੈਸਿੰਗ ਵਿਭਾਗ ਦੀ ਪ੍ਰਮੁੱਖ ਸਕੱਤਰ ਰਾਖੀ ਗੁਪਤਾ ਭੰਡਾਰੀ ਨੇ ਸ਼ੁੱਕਰਵਾਰ ਨੂੰ ਸ਼ੈਫੈਕਸ ਇੰਡੀਆ 2026 ਦੌਰਾਨ ਕਹੀ।
ਉਨ੍ਹਾਂ ਕਿਹਾ, “ਸਵਾਦ ਵੀ ਪੰਜਾਬੀ ਹੈ ਅਤੇ ਜਜ਼ਬਾ ਵੀ ਪੰਜਾਬੀ। ਹੁਣ ਕਹਾਣੀ ਫਾਰਮ ਤੋਂ ਫੋਰਕ ਅਤੇ ਫਾਰਮ ਤੋਂ ਗਲੋਬਲ ਤੱਕ ਲੈ ਕੇ ਜਾਣ ਦੀ ਹੈ। ਸ਼ੈਫ ਅਤੇ ਹਾਸਪਿਟੈਲਿਟੀ ਇੰਡਸਟਰੀ ਪੰਜਾਬ ਤੋਂ ਸਿਰਫ਼ ਸਾਮਾਨ ਨਾ ਖਰੀਦੇ, ਸਗੋਂ ਪੰਜਾਬ ਨਾਲ ਮਿਲ ਕੇ ਨਵੇਂ ਉਤਪਾਦ ਅਤੇ ਬ੍ਰਾਂਡ ਤਿਆਰ ਕਰੇ।”
ਕਿਸਾਨ ਤੋਂ ਸ਼ੈਫ ਤੇ ਉਦਯੋਗਪਤੀ ਤੱਕ ਇੱਕ ਮੰਚ ’ਤੇ
ਰਾਖੀ ਗੁਪਤਾ ਭੰਡਾਰੀ ਨੇ ਕਿਹਾ ਕਿ ਕਿਸਾਨਾਂ, ਫੂਡ ਉਦਯੋਗਪਤੀਆਂ, ਸ਼ੈਫ ਅਤੇ ਹਾਸਪਿਟੈਲਿਟੀ ਖੇਤਰ ਨਾਲ ਜੁੜੇ ਪੇਸ਼ੇਵਰਾਂ ਨੂੰ ਇੱਕ ਮੰਚ ’ਤੇ ਲਿਆ ਕੇ ‘ਫਾਰਮ ਟੂ ਫੋਰਕ’ ਨੂੰ ਹਕੀਕਤ ਬਣਾਇਆ ਜਾ ਸਕਦਾ ਹੈ। ਇਸ ਨਾਲ ਪੰਜਾਬ ਦੇ ਰਵਾਇਤੀ ਸਵਾਦ ਨੂੰ ਨਵੇਂ ਰੂਪ ਵਿੱਚ ਦੁਨੀਆ ਦੇ ਬਾਜ਼ਾਰਾਂ ਤੱਕ ਪਹੁੰਚਾਉਣ ਦੇ ਮੌਕੇ ਵਧਣਗੇ।
700 ਸ਼ੈਫ ਦੀ ਮੌਜੂਦਗੀ, ਏਆਈ ਤੇ ਤਕਨਾਲੋਜੀ ’ਤੇ ਮੰਥਨ
ਸ਼ੈਫੈਕਸ ਇੰਡੀਆ 2026 ਵਿੱਚ ਗੈਸਟਰੋਨੋਮੀ ਦੇ ਭਵਿੱਖ ਦੇ ਨਾਲ-ਨਾਲ ਹਾਸਪਿਟੈਲਿਟੀ ਕਾਰੋਬਾਰ ਵਿੱਚ ਆਰਟੀਫਿਸ਼ਲ ਇੰਟੈਲੀਜੈਂਸ ਅਤੇ ਆਧੁਨਿਕ ਤਕਨਾਲੋਜੀ ਦੀ ਵਰਤੋਂ ’ਤੇ ਵੀ ਚਰਚਾ ਹੋਈ। ਪੀਐਚਡੀਸੀਸੀਆਈ ਪੰਜਾਬ ਦੇ ਚੇਅਰ ਕਰਨ ਗਿਲਹੋਤਰਾ ਨੇ ਕਿਹਾ ਕਿ 700 ਸ਼ੈਫਾਂ ਦਾ ਚਿੱਟੇ ਕੋਟ ਪਾ ਕੇ ਸ਼ੈਫੈਕਸ ਇੰਡੀਆ ਵਿੱਚ ਪਹੁੰਚਣਾ ਸਮਾਗਮ ਵਿੱਚ ਨਵੀਂ ਊਰਜਾ ਲੈ ਕੇ ਆਇਆ। ਰਸੋਈ ਤਕਨਾਲੋਜੀ ਅਪਣਾਉਣ, ਫੂਡ ਕਾਰੋਬਾਰ ਨੂੰ ਵੱਡੇ ਪੱਧਰ ’ਤੇ ਲਿਜਾਣ ਅਤੇ ਗੈਸਟਰੋਨੋਮੀ ਦੇ ਭਵਿੱਖ ਨੂੰ ਆਕਾਰ ਦੇਣ ਬਾਰੇ ਮਾਹਿਰਾਂ ਨੇ ਵਿਹਾਰਕ ਹੱਲ ਸਾਂਝੇ ਕੀਤੇ।
ਉਨ੍ਹਾਂ ਕਿਹਾ ਕਿ ਸ਼ੈਫੈਕਸ ਇੰਡੀਆ ਦਾ ਮਕਸਦ ਸ਼ੈਫ, ਰੈਸਟੋਰੈਂਟ ਸੰਚਾਲਕਾਂ, ਹੋਟਲ ਕਾਰੋਬਾਰੀਆਂ, ਫੂਡ ਉਦਯੋਗਪਤੀਆਂ, ਸਪਲਾਇਰਾਂ ਅਤੇ ਤਕਨਾਲੋਜੀ ਕੰਪਨੀਆਂ ਨੂੰ ਇੱਕ ਮੰਚ ’ਤੇ ਜੋੜਨਾ ਹੈ।
ਸੈਕਟਰ-17 ਦੇ ਪਰੇਡ ਗਰਾਊਂਡ ਵਿੱਚ 18 ਤੋਂ 20 ਸਤੰਬਰ ਤੱਕ ਚੱਲ ਰਹੇ ਤਿੰਨ ਰੋਜ਼ਾ ਬੀ2ਬੀ ਸਮਾਗਮ ਵਿੱਚ ਫੂਡ ਪ੍ਰੋਸੈਸਿੰਗ, ਕੈਟਰਿੰਗ, ਹਾਸਪਿਟੈਲਿਟੀ ਅਤੇ ਰੈਸਟੋਰੈਂਟ ਉਦਯੋਗ ਨਾਲ ਜੁੜੇ ਨੁਮਾਇੰਦੇ ਹਿੱਸਾ ਲੈ ਰਹੇ ਹਨ। ਪੰਜਾਬ ਦੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਸ਼ਨੀਵਾਰ ਨੂੰ ਪ੍ਰਦਰਸ਼ਨੀ ਦਾ ਦੌਰਾ ਕਰਨਗੇ।
